Խուդաթյանն ու Կվրիվիշվիլին քննարկել են տրանսպորտի և էներգետիկայի ոլորտներում համագործակցությունը

ՀՀ տարածքային և ենթակառուցվածքների նախարար Դավիթ Խուդաթյանը Բաթումում մասնակցել է Վրաստանի միջազգային ծովային ֆորումի (GIMF 2026) պաշտոնական և հանդիսավոր բացման արարողությանը։

«Ֆորումին բացման ելույթներով հանդես է եկել Վրաստանի վարչապետ Իրակլի Կոբախիձեն։

Միջոցառումը համախմբել է շուրջ 40 երկրների ավելի քան 400 պատվիրակների։

Ֆորումի շրջանակներում այսօր հանդիպում եմ ունեցել Վրաստանի էկոնոմիկայի և կայուն զարգացման նախարար Մարիամ Կվրիվիշվիլիի հետ։

Հանդիպման ընթացքում քննարկել ենք տրանսպորտի և էներգետիկայի և ոլորտներում երկկողմ փոխգործակցությանն առնչվող հարցեր:

Ավիացիոն ոլորտի զարգացման համատեքստում երկուստեք ընդգծել ենք Հայաստանի և Վրաստանի քաղաքների միջև ուղիղ ավիահաղորդակցության նոր ուղղությունների մեկնարկի և չվերթերի ակտիվացման անհրաժեշտությունը։

Անդրադարձ է կատարվել նաև էներգետիկ բնագավառում ռազմավարական համագործակցության շարունակականությանը։

Քննարկել ենք բեռնափոխադրումների և լոգիստիկայի ոլորտում առկա խնդիրներն ու զարգացման հեռանկարները՝ ինչպես երկու երկրների, այնպես էլ լայն տարածաշրջանային համատեքստում:

Նախարար Մարիամ Կվրիվիշվիլիի հետ քննարկել ենք երկուստեք հետաքրքրություն ներկայացնող մի շարք այլ հարցեր»,- ասվում է նախարարի ֆեյսբուքյան գրառման մեջ։