Սոցիալական ցանցերում շրջանառվում է Ղազախստանի նախագահ Կասիմ-Ժոմարտ Տոկաևի մասին՝ ՀՀ վարչապետ Նիկոլ Փաշինյանին վերագրվող մեջբերում։
Համաձայն տարածվող պնդման՝ Փաշինյանն անդրադառնալով Ռուսաստանի կողմից Եվրոպական միությանը անդամակցության հանրաքվե անցկացնելու պարտադրանքի մասին հարցին ասել է․ «Ես Ղազախստանի նախագահը չեմ, որ ինձ Ռուսաստան կանչեն։ Եվ մենք այնքան հարուստ չենք, որքան ղազախները, որ տարեկան չորս հանրաքվե անցկացնենք։ Ինչպե՞ս կարող են նրանք ստիպել Հայաստանին հանրաքվե անցկացնել»։
Այս պնդումը սոցիալական մեդիայում սեպտեմբերի 6-ին հրապարակել է ռուսաստանցի լրագրող Սերգեյ Ասլանյանը․ նրա՝ Փաշինյանին վերագրվող մեջբերմամբ ու լուսանկարով գրառումը հոդվածի հրապարակման պահին հազարավոր հավանումներ է ունեցել, 300-ից ավելի օգտահաշիվներ տարածել են այն։
Արտապատկերումը՝ ֆեյսբուքյան գրառումից։
Փաշինյանի ճեպազրույցը՝ կեղծ լուրի առիթ
Այսպես, Փաշինյանի վերանագրով մեջբերման հիմքում ընկած է սեպտեմբերի 3-ի ճեպազրույցի ժամանակ լրագրողի հարցին ի պատասխան վարչապետի տված մեկնաբանությունը։
Լրագրողը, մասնավորապես, ԵՄ անադամակցության և ԵԱՏՄ-ում մնալու վերաբերյալ ՌԴ-ից հնչող հանրաքվեի մասին հարցը ձևակերպելիս ասել է, որ «Ռուսաստանը պարտադրում է հանրաքվե [Հայաստանին]», ինչպես նաև դիմելով Փաշինյանին ասել է՝ «Ձեզ կանչել են Ռուսաստան»։
Ի պատասխան այս ձևակերպումների Փաշինյանը նշել է․ «Էնպիսի տպավորության ա, որ Ձեր առջև կանգնած ա Հայաստանի ԽՍՀ Կենտկոմի առաջին քարտուղարը և ինձ կանչել են Ռուսաստան»։
Այսպիսով, այս հարցին պատասխանելիս Փաշինյանը չի հիշատակել ոչ Ղազախստանը, և ոչ էլ այդ երկրի նախագահին։ Հետևաբար, Փաշինյանին վերագրվող պնդումը կեղծ է։
Ո՞վ է կեղծիքը տարածողը
Ինչպես նշեցինք վերևում, Փաշինյանին վերագրվող կեղծ մեջբերմամբ գրառումը հրապարակել է ռուսաստանցի լրագրող Սերգեյ Ասլանյանը։
Ըստ բաց աղբյուրներում նրա մասին առկա կենսագրական տվյալների, Ասլանյանը
ռուսաստանյան «Эхо Москвы» (Մոսկվայի արձագանքը) լրատվամիջոցի լրագրող է, նա նախկինում աշխատել է ռուսաստանյան տարբեր հեռուստալիքներում ու ռադիոկայաններում, թղթակցել տարբեր պարբերականների, որոնց թվում են «Московский комсомолец», «Мотор» և «Автомир» պարբերականները և այլն։
Նա այժմ վարում է քաղաքական հաղորդումներ իր յութուբյան ալիքում, որն ունի մոտ 150 հազար բաժանորդ։
Նա 2023 թվականից ՌԴ արդարադատության նախարարության որոշմամբ հայտնվել է օտարերկրյա գործակալների ցանկում։
Արտապատկերումը՝ ՌԴ ԱՆ կայքէջից։
Այսպիսով, Փաշինյանին վերագրվող՝ Ղազախստանի նախագահ Կասիմ-Ժոմարտ Տոկաևի և Ղազախստանի հանրաքվեների մասին մեջբերումը կեղծ է։ Վարչապետի՝ սեպտեմբերի 3-ի ճեպազրույցի համապատասխան հատվածի ուսումնասիրությունը ցույց է տալիս, որ նա չի հիշատակել ո՛չ Ղազախստանը, ո՛չ Տոկաևին։
Սոցիալական ցանցերում տարածված տեքստը Փաշինյանի իրական պատասխանի փոփոխված տարբերակն է, որը ներկայացվել է որպես ուղիղ մեջբերում։ Այն հրապարակել է ռուսաստանցի լրագրող Սերգեյ Ասլանյանը, իսկ գրառումը կարճ ժամանակում լայն տարածում է ստացել։
Նյութի աղբյուրը` FIP:
