Երևանի քաղաքապետ Տիգրան Ավինյանը հայտարարել է, որ մայրաքաղաքում կան բազմաթիվ խնդիրներ, բայց բոլոր ուղղություններով տարվել են աշխատանքներ։ Նրա խոսքով՝ գրեթե ոլորտ չկա, որտեղ իրապես մեծ ծավալի աշխատանքներ արված չլինեն։
«Այս պահի դրությամբ Երևանի քաղաքապետարանը տեսնում է, որ մեր հիմնական խնդիրը երթևեկության կառավարման խնդիրն է։ Դրա համար է ստեղծվել Երևանի երթևեկության կառավարման կենտրոնը, և դրա համար են հավաքագրվում այն բոլոր տվյալները, որոնք այս պահին կան»,- ասել է քաղաքապետը։
Նրա խոսքով՝ այս գործընթացում առաջնային խնդիրը առողջ բանավեճի միջոցով որոշակի իրազեկման բարձրացումն է և որոշակի քայլերի շտկումները, որոնք քաղաքապետարանի գործադիր մարմինը կներկայացնի․ «Եթե մենք նայում ենք մեր նախորդ փորձին՝ համագործակցությանը մեր ընդդիմադիր գործընկերների հետ, կարելի է ասել՝ այդ պրակտիկան չի ստացվել»,- ասել է նա և հավելել, որ յուրաքանչյուր ռեֆորմ ու փոփոխություն փորձ է կատարվել տորպեդահարել։
