ՀՀ ԱԺ կրթության, գիտության, մշակույթի, սպորտի և սփյուռքի հարցերի մշտական հանձնաժողովը սեպտեմբերի 8-ին գումարել է առաջին նիստը, որի օրակարգում ընդգրկված էր 3 հարց։
Հանձնաժողովի նախագահ Սիսակ Գաբրիելյանը հայտնել է, որ հանձնաժողովի նախագահի տեղակալի պաշտոնում ընտրելու համար «Քաղաքացիական պայմանագիր» խմբակցությունն առաջադրել է Ալխաս Ղազարյանի թեկնածությունը։
Սիսակ Գաբրիելյանը ներկայացրել է թեկնածուի կենսագրական տվյալներն ու աշխատանքային գործունեությունը։
Քվեարկության արդյունքում Ալխաս Ղազարյանն ընտրվել է հանձնաժողովի նախագահի տեղակալ։
Ելույթ ունենալով՝ Ալխաս Ղազարյանը շնորհակալություն է հայտնել «Քաղաքացիական պայմանագիր» խմբակցությանը՝ վստահության և իր թեկնածությունն առաջադրելու համար։ Նա նշել է, որ մեծ պատասխանատվությամբ է ստանձնում այս բարձր պաշտոնը։
Հանձնաժողովը հաստատել է նաև իր աշխատակարգը և հանձնաժողովի անդամների կողմից քաղաքացիների ընդունելությունների ժամանակացույցը։
Ըստ այդմ՝ քաղաքացիների ընդունելությունները կկայանան յուրաքանչյուր ամսվա վերջին ուրբաթ օրը՝ ժամը 14։00-ից 16։00-ը՝ Բաղրամյան անցակետի 1-ին հարկի 1-ին սենյակում։
