Հայաստանում մանկահասակ երեխաների նկատմամբ սեռական ոտնձգությունների գործերը պատշաճ չեն քննվում, որովհետև մեծ հավանականությամբ նման դեպք տեղի է ունենում այն երեխաների հետ, որոնք ամուր սոցիալական թիկունք չունեն: Բա որ այդ իրավիճակում պետությունը թիկունք չկանգնի այդ երեխաներին, ո՞վ է թիկունք կանգնելու: Այդտեղ մեծ պրոբլեմ եմ տեսնում: Այդ մասին ճեպազրույցի ժամանակ ասաց վարչապետ Նիկոլ Փաշինյանը:
«Դրա քաղաքական պատասխանատուն ե՞ս եմ: Երբ ուզում ենք քաղաքական այդ պատասխանատվությունը կրել, ասում են՝ բա անկախությո՞ւնը, այսինքն՝ դատարանի անկախությունը դրա համա՞ր է, թալանչու օգտին և ընդդեմ բռնաբարված երեխաների՞ է: Ո՞նց կարող է նման բան լինել»,- ասաց նա՝ նկատելով, որ որպես վարչապետ՝ մաքսիմալ կոռեկտ է, որպեսզի չմտնի այն տեղերը, որտեղ պետք է չմտնի:
«Խնդրել եմ դատախազին, որ վերջին 10-15 տարում անչափահասների նկատմամբ սեռական ոտնձգության մասին ինչքան կարճված գործեր կան, ասել եմ՝ հանեք, անձամբ գործերը նայեք, որովհետև գնում եմ գյուղեր, մարդիկ բաներ են պատմում, գետինն եմ մտնում:
Ո՞նց կարող է նման բան լինել ընդհանրապես, ընդ որում՝ դեպքեր, որոնց մասին ամբողջ գյուղը գիտի, բնակավայրերը գիտեն»,- ասաց նա:
