Ռուսաստանը Հայաստանից որևէ դիմում չի ստացել Գյումրիում տեղակայված ռուսական ռազմաբազայի դուրսբերման վերաբերյալ. «Известия» թերթին հայտնել է ՌԴ արտաքին գործերի նախարարի տեղակալ Միխայիլ Գալուզինը։
«Հայկական կողմից Գյումրիում տեղակայված ռուսական ռազմաբազայի դուրսբերման վերաբերյալ որևէ դիմում չենք ստացել»,– ասել է նա։
Գալուզինի խոսքով՝ Մոսկվան շարունակում է ելնել այն դիրքորոշումից, որ ռուսական ռազմաբազան Հայաստանի և Հարավային Կովկասի անվտանգության ճարտարապետության կարևոր բաղադրիչն է։
Ավելի վաղ՝ սեպտեմբերի 1-ին, Ռուսաստանի նախագահ Վլադիմիր Պուտինը հայտարարել էր, որ եթե Երևանը կարծում է, թե Գյումրիում ռուսական ռազմաբազայի կարիքն այլևս չկա, ապա Ռուսաստանը կարող է հեռանալ նույնիսկ հաջորդ օրը և որևէ բան չի պարտադրի Հայաստանին։
Ի պատասխան՝ Հայաստանի վարչապետ Նիկոլ Փաշինյանը հայտարարել էր, որ Երևանը պատրաստ է Մոսկվայի հետ քննարկել Հայաստանում ռուսական ռազմաբազայի պահպանման հարցը, եթե Ռուսաստանը նման ցանկություն հայտնի։
