Եվրոպական խորհրդարանը 583 կողմ, 49 դեմ և 39 ձեռնպահ ձայներով ընդունել է Հայաստանի արտադրանքի նկատմամբ առևտրի ազատականացման ժամանակավոր միջոցների նախագիծը։
Նախաձեռնությամբ նախատեսվում է երկու տարով ժամանակավորապես կասեցնել հայկական մի շարք ապրանքների նկատմամբ մաքսատուրքերի կիրառումը և ազատականացնել Հայաստանից ԵՄ արտահանման շուրջ 80 տոկոսը։
«Հավատարիմ իր սկզբունքներին և հաստատակամ իր դիրքորոշմանը՝ եվրոպական ժողովրդավարության տաճարը՝ Եվրոպական խորհրդարանը, աջակցել է Եվրոպական հանձնաժողովի առաջարկին՝ «Արտադրված է Հայաստանում» ապրանքների համար առևտրային արտոնություններ տրամադրելու վերաբերյալ»,- այս մասին գրել է ԵՄ-ում Հայաստանի դեսպան Տիգրան Բալայանը։
Նախագիծը նախապես հավանության էր արժանացել նաև ԵՄ անդամ երկրների դեսպանների մակարդակով և Եվրոպական խորհրդարանի միջազգային առևտրի հանձնաժողովում։
