«Չե՞ք տեսնում այս դահլիճում ինչ-որ բան է պակասում, չե՞ք նկատում այս դահլիճում որևէ անհամաչափություն։ Կարո՞ղ է մի հատ խմբակցություն պետք է ավելի լիներ այստեղ ու ձեր թուլակամ որոշման արդյունքում չեղավ»,- այս հարցադրումները «Ուժեղ Հայաստան» խմբակցության ղեկավար Նարեկ Կարապետյանն ուղղեց Կենտոնական ընտրական հանձնաժողովի նախագահ Վահագն Հովակիմյանին։
Վ. Հովակիմյանն ասաց, որ եթե իր կողմից լինի վիրավորանքին համարժեք պատասխան, կարող է քաղաքական զսպվածության խախտում դիտարկվի։ Նա նաև ասաց, որ կենսագրությունով, աշխատանքի վայրով, մասնագիտությամբ անձի բարեվարքությունը գնահատելը՝ ամենակոպիտ, սխալ, ժողովրդավարությանը հակասող մոտեցումն է։
«Եթե բերեիք որևէ ապացույց, որ իմ կողմից որևէ ապօրինի որոշում է կայացվել, որևէ սուբյեկտիվ գնահատական է տրվել… Պարոն Կարապետյան, ինչ դուք որպես քաղաքական գործիչ գնահատում եք, ձեր իրավունքն է, բայց գնահատական տվողը Սահմանադրական դատարանն էր տվյալ դեպքում»,- ասաց ԿԸՀ նախագահը։
Նարեկ Կարապետյանը հայտարարեց, որ Վահագն Հովակիմյանը 7 օրվա տարբերությամբ հրաժարվել է ՔՊ կուսակցական պատկանելիությունից ու ընտրվել ԿԸՀ նախագահ. «Դուք չեք կարող լինել ԿԸՀ նախագահ, դուք չպետք է լինեք ԿԸՀ նախագահ, վառ արտահայտում եք հավասարակշռությունների մեխանիզմների բացակայությունը մեր երկրում»։
