| «Մինչև Արցախի մեր հայրենակիցները կկարողանան իրացնել վերադարձի իրենց իրավունքը, որը որևէ կերպ չի կարող դիտվել պատերազմի առիթ և հայ-ադրբեջանական հարաբերությունների լարվածությանը աճ հրահրող ակտ, նրանք պետք է ՀՀ-ում ապրեն արժանապատիվ և նրանց սոցիալ-տնտեսական կարիքները պետք է պատշաճ կերպով բավարարվեն»,- ԱԺ-ում արցախցիների հետ հանդիպման ժամանակ ասել է «Հայաստան» խմբակցության պատգամավոր Արթուր Խաչատրյանը։ «Առաջնային խնդիրներից մեկը, որին մեր հայրենակիցներն առնչվում են՝ բնակապահովման խնդիրն է. գումարը, որը հատկացվում է, միգուցե բավարար է բազմանդամ ընտանիքների համար, բայց միջին վիճակագրական ընտանիքների համար այդ գումարը բավարար չէ։ Իմ համոզմամբ՝ արցախցիների բնակապահովման լուծումը պետք է լինի սոցիալական բնակարանաշինությունը, երբ պետության միջոցներով կառուցվում են բնակարաններ, որոնք գնման իրավունքով տրվում են բնակարանային կարիք ունեցող ընտանիքներին, այսինքն մարդիկ որոշակի ժամանակ ապրելուց հետո կարող են գնել այն»,- նշել է ընդդիմադիր գործիչը։ |
16:01
Սեպտեմբեր 23, 2026
