ՄԱԿ-ի Գլխավոր ասամբլեայում իր ելույթից առաջ ԱՄՆ նախագահ Դոնալդ Թրամփը մնացել է առանց նախագահական նկարահանող խմբի։ CNN-ը, որը պետք է լուսաբաներ նախագահի մասնակցությամբ այս շաբաթ նախատեսված միջոցառումները, հրաժարվել է դա անել։ Մյուս չորս խոշոր հեռուստաընկերությունները նույնպես հրաժարվել են նկարահանել CNN-ի փոխարեն։ Ի պատասխան՝ Սպիտակ տունը հայտարարել է իր սեփական հեռարձակման ծառայությունը ստեղծելու մասին։
Այս աննախադեպ բոյկոտը կապված է ուրբաթ CNN-ի, ինչպես նաև Politico և MS NOW պարբերականների հանդեպ Սպիտակ տանն աշխատելու՝ Թրամփի արգելքի հետ՝ իր գործունեության, ինչպես ինքն է ասում, բացասական լուսաբանման պատճառով:
Չնայած Fox News-ը, ABC-ն, NBC-ն և CBS-ը չեն հայտնվել արգելքի տակ, նրանք հայտարարել են, որ գործընկերների հետ համերաշխության հիման վրա չեն ապահովի նախագահի հեռուստատեսային լուսաբանումը, քանի դեռ այդ սահմանափակումներն ուժի մեջ են։
«Խմբի մնացած բոլոր աշխատանքները կշարունակվեն սովորական ռեժիմով, ներառյալ Կոնգրեսի, բարձրաստիճան պաշտոնյաների ու առանձին միջոցառումների լուսաբանումը Վաշինգտոնում և ամբողջ երկրում»,- ասել է Fox News-ի Վաշինգտոնի բյուրոյի ղեկավար Բրայան Բոուտոնը։
Այսպիսով՝ ԱՄՆ նախագահը երկուշաբթի Նյու Յորք է մեկնել՝ առանց նախագահական հիմնական մեդիա թիմի։
Դրանից անմիջապես հետո Սպիտակ տունը գործարկել է Trump TV-ի սեփական հեռարձակման ծառայությունը, որը շուրջօրյա ներկայացնում է նախագահի մասնակցությամբ տեսանյութերը:
