Երևանի քաղաքապետի մամլո խոսնակ Հակոբ Կարապետյանը ֆեյսբուքյան իր էջում գրել է․
Շաբաթօրյա խոհեր.
Երեւանի ավագանու հարգարժան անդամ Դավիթ Խաժակյանը վերջին երկու օրերին վերականգնել է իր հանրային ակտիվությունը՝ խախտելով վերջին երկու ամիսների հարաբերական լռությունը (հղումը՝ մկնաբանությունում):
Առիթը քաղաքապետարանում որոշ կադրային փոփոխություններն են, որոնք հարգարժան պ. Խաժակյանը ներկայացնում է որպես «անառողջ մթնոլորտի» ու «ճամպրուկային տրամադրությունների» վկայություն: Հիշեցնեմ՝ անցած շաբաթվա ընթացքում քաղաքապետը նշանակվել է երկու վարչական շրջանի նոր ղեկավար եւ հեռացել է սոցապ վարչության երկարամյա ղեկավարը: Դրանից առաջ էլի մեկ-երկու պաշտոնյա է հեռացել: Նշանակումներ ու ազատումներ, որոնք պլանավորվել են ամիսներ շարունակ, ու ընդհանրապես, կադրային վերադասավորումները, նորերի ներգրավումը շարունակական պրոցես է ցանկացած համակարգում:
Խաժակյանը, նաեւ տուրք տալով արդեն ձեւավորված գործելաոճին՝ դեղնավուն մամուլի «պասերով» խոսում է ինչ-ինչ խորհրդավոր չարաշահումների մասին, որոնք իբր իրենց վրա են հրավիրել իրավապահների ուշադրությունը: Անցած շուրջ մեկուկես տարին ցույց է տվել, որ քաղաքապետարանի ներսում վերահսկողական գործընթացը անընդհատ է, իսկ իրավապահների հետ առնչությունները երկուստեք են, այսինքն, ե՛ւ քաղաքապետարանն է ընթացքում հայտնաբերված կասկածելի փաստերը ուղարկում իրավապահներին, եւ՛ հակառակը՝ իրավապահներն են ենթադրյալ խախտումնեի վերաբերյալ տեղեկություններով ուսումնասիրություններ անցկացնում: Սա հենց առողջ համակարգի կամ համակարգի առողջացման մասին վկայող նորմալ գործընթաց է:
Ի դեպ, Ավագանու հարգարժան անդամը էստեղ նաեւ հակասական ռեակցիա է ցուցաբերում նույն երեւույթի նկատմամբ՝ միեւնույն հարցազրույցում խոսելով քաղաքապետարանումչարաշահումների նկատմամբ անբավարար վերահսկողության մասին, իսկ մի քանի պարբերություն ներքեւ դժգոհելով չարաշահումների դեմ պայքարի ինտենսիվությունից: «Առհասարակ քաղաքապետարանում չարաշահումների վերհանումն անհրաժեշտի չափն անցել է և վերածվել է մոլուցքի», – բառացիորեն ասում է Դ. Խաժակյանը:
Առհասարակ, կարծում եմ, պետք է կողմնորոշվել ցանկությունների հարցում:
Ու մեկ էլ իհարկե, վերջապես ներկայացնել ապացույցներ՝ «փո՛ղ, փո՛ղ են տվել, Կամազ չեն տվել»-ի մասին իր ու իր քաղաքական լիդեր Է. Մարուքյանի արած հայտարարությունների իսկության վերաբերյալ: Այլապես, ամեն հաջորդ օրը ավելի է ամրապնդում համոզմունքը, որ «փո՛ղ, փո՛ղ»-ը օրվա մեդիակարիքից դրդված դատարկ հայտարարություն էր՝ թեմայի շուրջ մեդիաաղմուկը ավելի աղմկոտ դարձնելու նպատակով:
Եվ մեկ էլ, արժե, անցած տարվա «աղբային» ձախողումից ու Կամազգեյթի անփառունակ կամպանիայից, մասնավորապես, քննչական ամուլ օպերացիաներից հետո նոր՝ քաղաքի համար օգտակար նախաձեռնությունների մասին մտածել:
Եվ մեկ էլ, արժե ամեն դեպքում, ներողություն խնդրելու համար հարմար օր ընտրել:
