Թեպետ քարոզչամեքենան լծվել է հասարակությանն ապակողմնորոշելու և կառավարության նկատմամբ ժողովրդի վստահությունը սասանելու գործին, թեպետ քաղաքական հետապնդման մասին է խոսում ԱԱԾ-ում 9 ժամ անցկացրած Գագիկ Ծառուկյանը, այնուամենայնիվ ակնհայտ է, որ հարուցված քրեական գործերն են հիմք հանդիսացել ԲՀԿ առաջնորդ Գագիկ Ծառուկյանի՝ կառավարությունը 100 տոկոսով փոխելու ցանկության համար և ոչ թե երկրի անկայուն վիճակն ու անկառավարելի դարձած վիրուսի տարածումը։ Այդ մասին է վկայում աղմկահարույց հայտարարություններին անմիջապես հաջորդած Նիկոլ Փաշինյանի մամուլի խոսնակ Մանե Գևորգյանի տարածած հաղորդագրությունը, որում մասնավորապես ասված էր․«Պարոն Ծառուկյանը պարզապես մտահոգված է մի շարք քրեական գործերի ընթացքով, որոնք վերաբերում են փողերի լվացմանը, ընտրակաշառք բաժանելուն, հարկերից խուսափելուն, կոռուպցիային»։ Հստակ է՝ Ծառուկյանը փորձ արեց իշխող վարչախմբին «վախեցնել» պահի ռիսկայնությամբ և կասեցնել սպառնացող վտանգը, սակայն ապարդյուն․․․
Տարիներ շարունակ Գագիկ Ծառուկյան գործարարի շահերը Ազգային ժողովում սպասարկող ԲՀԿ պատգամավորներին նույնպես այլ բան չէր մնում, քան շարունակաբար պնդել՝ իրավական գործընթացի հիմքում խմբակցության ղեկավարի հունիսի 5-ին հնչեցրած մտահոգություններն են, որին իշխանությունները պատասխանեցին ուժային ճնշումներով՝ խուսափելով քաղաքական բովանդակային պայքարից։ Ավելին՝ պատգամավոր Գևորգ Պետրոսյանը, վերհիշելով քաղաքական ուժի անցած ուղին, նշեց՝ եղել են անհատական հետապնդումներ, բանսարկություններ, սակայն նման «տոտալ գրոհ» ոչ մի կերպ չմտաբերեց։
Ամենևին զարմանալի չէ, որ Պետրոսյանը մոռացել է չարաբաստիկ 2015 թվականը, զարմանալի չէ, որ «երախտապարտ» բհկ-ականներն իրենց անվերապահ հավատարմությունն են արտահայտում կուսակցության առաջնորդին նստացույցերով և բարձրագոչ հայտարարություններով, նաև զարմանալի չէ, որ Հայաստանի պես սահմանափակ ռեսուրսներ ունեցող երկրում միլիոններ կուտակած Ծառուկյանի «գործունեությամբ» հետաքրքրվում է ԱԱԾ-ն։ Զարմանալի մնում է միայն մի բան՝ քաղաքական նպատակահարմարությունից պարբերաբար ճկվող էլաստիկ ուժը, որ հմտացել է սակարկությունների և քաղաքական առևտրի մեջ, դեռ սպառնում և վերջին հնարավորությունն է տալիս երկրի լեգիտիմ իշխանություններին, որ Նաիրա Զոհրաբյանի կողմից ձևակերպվեց հետևյալ կերպ․«Իշխանությունն անցել է բոլոր կարմիր գծերը և վերջին հնարավորությունն ունի՝ ՀՀ-ում իրադարձություններն անդառնալի չդարձնելու համար»։
Քրիստինե Հովսեփյան
