Երևանի քաղաքապետարանի և քաղաքապետ Հայկ Մարությանի վերաբերյալ շարունակաբար աղմկահարույց հաղորդագրություններ կարդալուց հետո, ակամա մտածում ես՝ լավ, բա ո՞չ մի աշխատանք չի կատարվում ի նպաստ քաղաքի, որ Թեհմինա Վարդանյանը, Դավիթ Խաժակյանը մոռանում են գոնե մեկ-մեկ հիշատակել…
Հաշվի առնելով, որ Երևանի քաղաքապետարանի ընդդիմադիր թևի ավագանու անդամները («Լույս», «Բարգավաճ Հայաստան») լծված են ընդդիմադիրի «չարքաշ» աշխատանքին և պահը բաց չեն թողնում անդրադառնալու քաղաքապետի և քաղաքապետարանի միմիայն բացթողումներին կամ «առերևույթ կոռուպցիոն ռիսկերին», որոնք ոչ միշտ են հավաստի և, երբեմն, նույնիսկ չեն տեղավորվում «աչալուրջ» ավագանու պաշտոնեական լիազորությունների շրջանակում, ինքնակամ պարտավորություն ենք ստանձնել ներկայացնելու ընթերցողին վերջին ամիսներին կատարված աշխատանքների մի մասը։
Համայնքային սեփականություն հանդիսացող գույքը համայնքին վերադարձնելու արդյունքում մանկապարտեզներին են վերադարձվել հիմնանորոգված խմբասենյակներ։
Օղակաձև զբոսայգու 6-րդ հատվածի հիմնանորորոգման աշխատանքները սկսված են և կբարեկարգվի շուրջ 16 000 քմ տարածք։
«Ազնավուր կենտրոն»-ի համար նախագծվում է նոր շենք, որը ավելի հարմար կլինի կենտրոնի գործունեության համար և քաղաքի առանցքային հատվածին համահունչ տեսք կունենա։
Պայմանավորված երկրում հաստատված արտակարգ դրությամբ՝ ամեն օր քաղաքապետարանի ենթակայության տակ գտնվող հավաքակայաններում ախտահանվում է 155-160 ավտոբուս ՝ նվազագույնի հասցնելու համար ուղևորների վարակվելու հավանականությունը։ Նաև՝ ամենօրյա ռեժիմով քաղաքապետարանը Արտակարգ իրավիճակների նախարարության հետ համատեղ ախտահանում է Երևանի կանգառներն ու առևտրային խոշոր ցանցերի մուտքերը։
Երևանի երթուղային ցանցը մինչև տարեվերջ կհամալրվի 100 նոր ավտոբուսներով։
Բուսաբանական այգու տարածքում քանդվել են մի շարք ինքնակամ կառույցներ։ Շուրջ 30 կրպակ է ապամոնտաժվել Արաբկիրում։ Նշենք, որ բնակելի շենքերի բակերում նույնպես կատարվում են քանդման աշխատանքներ, բարեկարգվում և խաղահրապարակներ են կառուցվում գրեթե բոլոր վարչական շրջաններում։ Տեղադրվում են նոր աղբամաններ, թեպետ ոմանք ջանասիրաբար դրանք այրում են։
Այս տարի մայրաքաղաքում իրականացվում է նոր որակի և ծավալների կանաչապատում, որոշ հատվածներում (Խանջյան փողոց) մայթեզրի սալիկները փոխարինվում են սիզամարգերով։
Երևանի քաղաքապետի որոշմամբ՝ քաղաքապետարանի աշխատակազմի եռամսյա պարգևավճարներից՝ մարտ ամսվա պարգևավճարների ֆոնդն ամբողջությամբ՝ շուրջ 130 միլիոն դրամ, փոխանցվել է համայնքային ենթակայության բուժհիմնարկների աշխատակիցներին։ Միաժամանակ, օգնություն է ցուցաբերվել միայնակ ծերերին ծանրոցների տեսքով…
Ցանկը դեռ կարելի է շարունակել, բայց կանգ առնենք, քանի որ կատարված գործը գովազդելու նպատակ էլ չենք հետապնդում, ավելին՝ կարծում ենք քաղաքապետարանը գործում է լիազորությունների շրջանակում և հետևողականորեն լուծում է իր առջև ծառացած խնդիրները։ Պարզապես ցանկություն է առաջանում բարեկամական խորհուրդ տալու՝ պետք է վեր լինել «ճղճիմ սկանդալներից», «էժանագին գրառումներից», որն, ի դեպ, դեռևս բացառապես բացասական է անդրադառնում «ազնիվ ընդդիմադիրի» կերպարի վրա և բացթողումների կողքին չանտեսել արվածը։
