Մանկական երկաթուղու, այգու, ինչպես նաև նախկին Կենտրոնական փոստի շենքի և հարակից տարածքների վերակառուցման ու կառուցապատման ծրագրային առաջարկներին վերաբերող հարցեր են քննարկվել Երևանի քաղաքապետ Հայկ Մարությանի և գլխավոր ճարտարապետ Արթուր Մեսչյանի գլխավորությամբ տեղի ունեցած աշխատանքային խորհրդակցության ժամանակ: Քննարմանը մասնակցել են նաև ՀՀ կառավարության տարբեր գերատեսչությունների ներկայացուցիչներ: Կարևորելով նման ձևաչափով ներդրումային ծրագրերի քննարկումը՝ քաղաքապետ Մարությանը նշել է, որ նպատակը պետական տարբեր կառույցներին քաղաքի հետ կապված առաջարկները հասանելի ու լսելի դարձնելն է:
«Այս հանդիպման նպատակը՝ լսված լինելու հանգամանքն է, որ բոլոր այն տնտեսվարողները, որոնք ունեն հետաքրքիր առաջարկներ,հնարավորություն ունենան ներկայացնել այդ առաջարկները ոչ միայն քաղաքային իշխանություններին, այլև կառավարությանը, որպեսզի երկու կողմերն էլ լսեն և այսպես ասած նույն գծի մեջ լինեն: Որպես երկրորդ քայլ,քաղաքային իշխանությունը և կառավարությունը իրենց համար հասկանան, ինչ ապագա պետք է ունենա քաղաքի այս հատվածը, որը մեր երևանցիների համար հարազատ, սրտին մոտ, իրենց մանկությունից եկող մի վայր է և չի կարող շարունակել մնալ այն վիճակում, որն այսօր կա»,- ընդգծել է քաղաքապետը:
Շնորհանդեսի միջոցով «Բերքլի Քեփիթլ»,«Բողոսյան» հիմնադրամ,«Նոր Երևան» և «Դեֆի», «Ռենշին»,«Ռուցոգ ինվեստ» ինվեստիցիոն հոլդինգ, «Մանկական երկաթուղի» ընկերությունների ներկայացուցիչները ներկայացրել են իրենց ծրագրային առաջարկները: Դրանք նախատեսում են միջազգային չափանիշներին համապատասխան ժամանցի և սպորտային կենտրոնի ստեղծում, երկաթուղու արդիականացում ու կայարանների վերակառուցում, ստորգետնյա ավտոկայանատեղիի կառուցում, Հրազդանի կիրճի հետ կապող թունելների վերանորոգում և մի շարք այլ ծրագրեր, որոնք կարևոր դերակատարում կունենան քաղաքի այդ հատվածը հանգստի լիարժեք գոտի դարձնելու, ինչպես նաև զբոսաշրջիկների համար ևս գրավիչ միջավայր ստեղծելու հարցում:
«Երևանի քաղաքապետարանը ՀՀ կառավարության գործընկերների հետ այս բոլոր ծրագրերը լսելուց հետո ի մի կբերի, կհասկանանք պոտենցիալը այս ծրագրերի, իրավական մասերը և ըստ դրա կգանք մի որոշման: Այս քննարկումներին, որ մարդիկ ներկա են, տեսնում են, որ գործընթացը մաքսիմալ թափանցիկ է և մաքսիմալ անկողմնակալ: Ինձ համար քաղաքի շահն է կարևոր, թե տնտեսվարողը որքան գումար կաշխատի ինձ չի հետաքրքրում: Առաջին հերթին քաղաքի տեսքի, բնակիչների համար հարմարավետության և յուրաքանչյուր կառույցի նպատակահարմարության ապահովումն է, ինչպես նաև քաղաքի համար տնտեսապես արդյունավետ ներդումային ծրագրի կյանքի կոչումը, որպեսզի այն սկսվի և ավարտվի, լինի իրատեսական»,- նշել է Հայկ Մարությանը:
Քննարկման մասնակիցներն իրենց հետաքրքրող հարցերը, դիտարկումներն ու առաջարկներն են ներկայացրել տնտեսվարողներին:
