ԱԺ ԲՀԿ խմբակցութունը պատրաստվում է ստեղծել քննիչ հանձնաժողով ևդիմել Սահմանադրական դատարան,- այսօր խորհրդարանում լրագրողների հետ զրույցում հայտարարեցին պատգամավորներ Վահե Էնֆիաջյանն ու Իվետա Տոնոյանը:
«Մեր խմբակցությունը նախաձեռնում է քննության ենթարկել, իրական վիճակագրական տվյալներ ներկայացնել կորոնավիրուսային իրավիճակի հետ կապված», – նշեց Էնֆիաջյանը: Տոնոյանը նշեց, թե նախաձեռնությունները երկուսն են: Կորոնավիրուսի կանխարգելման, հետեւանքների վերացման աշխատանքները ուսումնասիրող քննիչ հանձնաժողով ձևավորելու վերաբերյալ նախաձեռնությամբ են հանդես գալու և դիմելու են Սահմանադրական դատարան՝ վիճարկելու արտակարգ դրության պայմաններում հավաքների արգելման հետ կապված որոշման իրավաչափությունը։
«Աշխատանքներն արդեն իսկ ընթացքի մեջ են: Մենք դիմել ենք նաեւ «Լուսավոր Հայաստան»-ի մեր գործընկերներին: Սա այս պահին կարևոր է, որպեսզի պարզենք, թե որքանով են կառավարության, պարետատան կողմից կատարված աշխատանքները եղել ժամանակին, քանի որ շատ դեպքերում նրանց կողմից հապաղման պարագայում կարող էին լինել այս ահագնացող մահերը», – հավելեց Տոնոյանը:
