Ինչպես ավելի վաղ տեղեկացրել էինք, այսօր ԱԺ «Բարգավաճ Հայաստան» խմբակցությունը հանդես է գալու երկու նախաձեռնությամբ։ Նախ խմբակցությունն առաջարկում է ձևավորել ԱԺ քննիչ հանձնաժողով՝ կորոնավիրուսի կանխարգելման առումով իշխանությունների իրականացրած քայլերը ուսումնասիրելու նպատակով և միաժամանակ առաջարկել արտակարգ դրության պայմաններում հավաքների սահմանափակման արգելքի Կառավարության որոշումը վիճարկել Սահմանադրական դատարանում:
Այս ծրագրերի իրագործումը հնարավոր է միայն «Լուսավոր Հայաստան» խմբակցության աջակցությամբ:
Այսօր արդեն լրագրողների հետ զրույցում ԼՀԿ ղեկավար Էդմոն Մարուքյանը անդրադարձավ գործընկերների նախաձեռնությանը.
«Մենք քննիչ հանձնաժողով ստեղծելու գաղափարին կաջակցենք այն դեպքում, եթե այն նախագահի մեր ներկայացուցիչը, մանավանդ , որ մենք այդպիսի միտք ավելի վաղ էինք առաջարկել: Ինչ վերաբերում է ՍԴ դիմելուն, ապա նշեմ, որ ես վերջին նիստին կոչ էի արել վերանայել հավաքների արգելքի դրույթը՝ հնարավորություն տալով քաղաքացիներին իրենց բողոքի ձայնն արտահայտել»:
