Ազգային ժողով-կառավարություն հարց ու պատասխանի ժամանակ վարչապետ Նիկոլ Փաշինյանն անդրադարձավ ԲՀԿ ղեկավար Գագիկ Ծառուկյանին անձեռնմխելիությունից զրկելու և նրա նկատմամբ քրեական գործ հարուցելու մասին հարցերին։ Նա անդրադարձավ շահարկումներին, որ այս դեպքերը քաղաքական ենթատեքստ ունեն։
Փաշինյանը հայտարարեց՝ քննվում է երրորդ հանրապետության պատմության ամենակարևոր գործերից մեկը։ «Որովհետև ի վերջո ժողովրդի կամքի վրա բռնանալու համակարգված ինստիտուտ է բացահայտվում»,- ասաց նա։
«Ձեր նշած մեկնաբանությունները հիմնվում են այն կախավարկածի վրա, որ ԲՀԿ նախագհը հայտարարություն է արել, որից հետո սկսվել են քրեական գործեր։ Հենց այդ հայտարարությանը այդ օրը իմ մամուլի խոսնակն արձագանքել է, որ կարծում եմ՝ պարոն Ծառուկյանը մտահոգված է մի շարք քրեական գործերի ընթացքից, և հայտարարության պատճառը դա է։ Բայց եկեք նայենք վերջին երկու տարվա վիճակագրությանը։ 2018 թվականի հուլիսի 5-ին, երբ ԲՀԿ ներկայացուցիչները մեր կառավարության կազմում էին, քրեական գործ էր հարուցվել հիմա ԱԺ պատգամավոր Էդուարդ Բաբայանի դեմ՝ հայտնի ծեծի դրվագով։
Հետո՝ հուլիսի 6-ին, Էդուարդ Բաբայանը կալանավորվել էր, գործն ուղարկվել էր դատարան, կայացվել մեղադրական դատավճիռ։ Խոսվում է Նվեր Ծառուկյանի մասին՝ Ծառուկյանի որդու։ 2019 թվականի հունվարի 29-ին Աբովյանի հայտնի սպանության առիթով հարուցվել է քրեական գործ։ Հունվարի 29-ին Նվեր Ծառուկյանը հարցաքննվել է որպես վկա փաստացի կասկածի շուրջ։ Խուզարկություններ են կատարվել Նվեր Ծառուկյանի բնակության վայրում, այդ թվում՝ Ծաղկաձոր քաղաքի առանձնատանը»,- ասաց Նիկոլ Փաշինյանը։
Վարչապետը նշեց, որ 2019 թվականի դեկտեմբերի 28-ին Կարապետ Գուլոյանի, ով Գագիկ Ծառուկյանի փեսան է, գործողությունների հետ կապված հարուցվել է քրեական գործ։ Այդ քրեական գործով պատճառված վնասը փոխհատուցվել է, ինչն էլ նշանակում է, որ մարդիկ մեղքն ընդունել են։ Ընդ որում՝ պետական նշանակության հողերը ծիծաղելի գներով՝ 290 մլն դրամի փոխարեն 700 հազար դրամով վաճառելու մասին է խոսքը։ «Դեռևս 2019 թվականի սեպտեմբերի 20-ին Հյուսիս-հարավ ճանապարհի գործով կալանավորելու միջնորդություն է ներկայացվել Սեդրակ Առուստամյանին։ Հետո Սեդրակ Առուստամյանը կալանավորվել է Գագիկ Խաչատրյանի գործով։ Եվ ես ուզում եմ սրան հավելել այն, որ մի քանի անգամ ասել եմ՝ կոռուպցիոն գործերով մեր իրավապահ մարմինները էֆեկտիվ չեն գործում։ Եվ կարող եմ ասել, որ այն պաշտոնանկությունների մեջ նաև որոշակի դեր է ունեցել այս պրոցեսը։ Որոշ օղակներում ես զգացել եմ, որ կոռուպցիոն գործերն առաջ չեն գնում։ Եվ այդ հայտարարությունը հնչել է այն ժամանակ, երբ ԱԱԾ-ում արդեն մեծ փոփոխություններ էին տեղի ունեցել»,- ասաց նա։
Ըստ Փաշինյանի՝ այս ընթացքում իրավապահ մարմիններում եղել են խնդիրներ։ «Առավոտ ժամը 7-ին իրավապահ մարմինները գնում էին խուզարկության, տենում էին տան տիկինը մակիյաժով, երեկոյան զգեստով դուռը բացեց։ Կոնկրետ դեպք է։ Եվ ինչն է եղել ձեր նշած քաղաքական ուժի ֆաբուլան։ Եղել է հետևյալը՝ որ իշխանությունը նախկինում այս քրեական գործերը միշտ օգտագործել է, որպեսզի այդ ուժերին պահի կոնտրոլի տակ, մտցնի կոալիցիա և այլն, որովհետև լեգիտիմության խնդիր է ունեցել։ Իսկ մեր իշխանությունն այդպիսի խնդիր չունի, մեզ պետք չէ քրեական գործերը դարձնել քաղաքական առևտրի առարկա, որ երկու հայտարարություն պակաս անեն կամ մի քիչ խոսելու ձև ընտերն։ Մենք իրենց խոսելու ձևը, ընտրելու ձևը գիտենք, կսովորեցնենք․․․ Ես ասացի՝ իրենք այստեղից չեն էլ խոսա, որովհետև ժողովուրդն իրենց այստեղից վռնդելու է ընդհանրապես։ Նախկինում, երբ կոռուպցիոն գործերը բացհայտվել են, ասել են՝ դե եկեք տեսնենք՝ ով, որտեղ, ինչ։ Երբ փողը դրված է եղել հիմքում, այս ամենի արդյունքը եղել է այն, որ մեկի փողը մի քիչ պակասել է, մեկինը մի քիչ ավելացել է։ Մենք հիմա ասում ենք՝ ոչ, բոլորը փողերը պետք է վերադարձնեն։ Ասել եմ՝ կոպեկ առ կոպեկ վերադարձնելու եք»,- հայտարարեց Փաշինյանը։
