«Ազգային ժողովի ընդդիմադիր մեր գործընկերները քաղաքական հստակ ուղղվածություն ունեցող քաղաքագետներն ու փորձագետները ռուսական եթերից ուղղակի լուտանքներ են թափում Հայաստանի, Հայաստանի պետականության նկատմամբ։ Այս ամենը տեղավորվում է պարզագույն «դրսից տղա բերելու» էժանագին ու հակապետականության տրամաբանության մեջ», – քիչ առաջ ԱԺ ամբիոնից հայտարարեց պատգամավոր Արման Բաբաջանյանը՝ նկատելով, որ նման գործողությունները բացահայտում են չափազանց ցավալի, հանուն նպատակներին հասնելու մեջ խտրություն չդնելու մի իրողություն։
Պատգամավորը նշեց, որ սխեման շատ պարզ է՝ սկզբում նրանք վազում են իրենց հովանավորյալ երկրի դեսպանատուն, Հայաստանի վերաբերյալ բողոքի չափաբաժինը ներկայացնում դեսպանին, ապա հայտնվում են ռուսական եթերում, որը լցնում են ոչ միայն կեղտոտ հայտարարություններով, այլև ռուս հաղորդավարի ցնդաբանություններով։
«Սա անթույլատրելի և դատապարտելի գործելաոճ է։ Բոլոր այս սուբյեկտները այս ամբիոնից սեփական ժողովրդի հետ խոսելու փոխարեն նախընտրում են օտարներին՝ ցույց տալով, որ չունեն իրենց երկրում տեր զգալու և հայրենիքի չնչին զգացողություն»,- ասաց Բաբաջանյանը և շեշտեց, որ նման պահվածքը չի ջնջվելու ժողովրդի հիշողությունից։
Հիշեցնենք, որ երեկ Հայաստանում Ռուսաստանի արտակարգ և լիազոր դեսպան Սերգեյ Կոպիրկինը հանդիպել է ՀՀ ԱԺ փոխխոսնակ Վահե Էնֆիաջյանի և Միքայել Մելքումյանի հետ։ Ըստ դեսպանատան տարածած հաղորդագրության՝ ի թիվս այլ հարցերի քննարկման, պատգամավորները կիսվել են իրենց տեսլականով երկրի ներքաղաքական օրակարգի որոշ խնդիրների վերաբերյալ։
