1990-1995թթ ՀՀ ԳԽ պատգամավոր, 1994-1998թթ ՀՀ Կենտրոնական բանկի նախագահ, տնտեսագետ Բագրատ Ասատրյանը համոզված է, որ այն, ինչ այս օրերին տեղի է ունենում «Բարգավաճ Հայաստան» կուսակցության առաջնորդ Գագիկ Ծառուկյանի շուրջ՝ Նիկոլ Փաշինյանի իշխանության պայքարն է տարիներ շարունակ Հայաստանում արմատավորված օլիգարխիայի դեմ:
«Սա դաշտի ընդհանուր առողջացման գործընթացի հերթական փուլերից մեկն է. օլիգարխիան Հայաստանում շատ վաղուց է պարտվել, վաղուց է իրեն բարոյապես սպառել՝ սկսած 2008թ-ի մարտի 1-ից, երբ օլիգարխիան ընդդիմացավ համաժողովրդական շարժմանը: Այս երևույթն ինքնին չարիք էր՝ թե՛ տնտեսության, թե՛ պետության, թե՛ անգամ նաև այդ մարդկանց համար և հասկանալի էր, որ դրա կյանքն երկար չէր կարող տևել: Եկեք ճիշտը խոսենք՝ Ծառուկյանն ի՞նչ գործ ուներ պառլամենտում, կամ սրանից առաջ եղած խորհրդարանում օլիգարխ-պատգամավորներն ի՞նչ էին անում, նրանք ընդհանրապես ի՞նչ գործ ունեին քաղաքական դաշտում:
Ես, իհարկե, չեմ կարծում, որ «Բարգավաճ Հայաստանը»-ը այն ուժն է, որն ունի քաղաքական բավարար բովանդակություն և կարող էր ռեալ վտանգ ներկայացնել Փաշինյանի իշխանության համար կամ վախեցներ վարչապետին: Սա ասում եմ ոչ թե այն պատճառով, որ իշխանություններն իդեալական են՝ բնավ ոչ, միանշանակ կան թերացումներ, բացթողումներ ու բազում չլուծված խնդիրներ, բայց այս իշխանությունը լեգիտիմ է և Փաշինյանն էլ բավարար հեղինակություն և վստահություն ունի»,- «Առաջին լրատվական»-ի հետ զրույցում շեշտեց Բագրատ Ասատրյանը՝ միևնույն ժամանակ հավելելով նաև, որ ինքն այստեղ քաղաքական հետապնդման ենթատեքստ չի տեսնում, այլ տեղի ունեցող իրադարձությունները միանգամայն տեղավորվում են իրավական հարթության մեջ, իրավական պետություն կառուցելու համատեքստի մեջ:
Ամբողջական հարցազրույցը՝ սկզբնաղբյուրում:
