«Խիստ մտահոգիչ երևույթ է Քրեական վերաքննիչ դատարանի դատավոր Արսեն Նիկողոսյանի մասնավոր ու ընտանեական կյանքի թիրախավորմամբ, խիստ անձնական բնույթի տվյալների օգտագործմամբ, նրան ու նրա մանկահասակ երեխաների հանդեպ ատելության խոսքը»,- ասված է Մարդու իրավունքների պաշտպան Արման Թաթոյանի հայտարարության մեջ։
Երեկ կայացած դատական նիստից հետո, ինչպես և սպասելի էր, սոցիալական հարթակները հեղեղվեցին Արսեն Նիկողոսյանին ուղղված վիրավորական մեկնաբանություններով, իսկ Հանրային խորհրդի նախագահ Ստյոպա Սաֆարյանը իր էջում գրառման հետ միաժամանակ տեղադրեց Ռուբեն Մելիքյանի՝ մանկահասակ երեխաների հետ համատեղ ընտանեկան լուսանկարը, որին հետևեց համացանցային հրաձգությունը պայմանական ասած «սևերի» և «սպիտակների» միջև։
Թեև Հանրային խորհրդի նախագահը պարզաբանեց, որ նկարը տեղադրելիս մտադրություն չի եղել ուշադրություն հրավիրել երեխայի վրա, իսկ մեկնաբանություններում անդրադարձ կամ անձնական վիրավորանք չի եղել երեխայի հասցեին, այնուամենայնիվ հակառակ բևեռն առիթը բաց չթողեց բոլոր հնարավոր լրատվամիջոցներով կատարվածը դատապարտելու և «սա դու չես մարսելու» տրամաբանության մեջ սպառնալիքներ տեղալու համար։
Այս ամենին օպերատիվ միացավ Արման Թաթոյանը՝ ընդգծելով, որ մերժելի երևույթ է համարում երեխային ատելության թիրախ դարձնելը և առավել մտահոգիչ է համարում այն, որ գրառման ներքո արվող արժանապատվությունը նսեմացնող և ատելություն գեներացնող մեկնաբանությունները չեն հեռացվում։ Հաշվի առնելով, որ շատ հաճախ Ստյոպա Սաֆարյանը նշում է, որ իր անձնական վերաբերմունքն այս կամ այն հարցի շուրջ ինքն արտահայտում է ոչ աշխատանքային ժամերին, Թաթոյանն արձանագրել է՝ նման ձևակերպումն արդարացում լինել չի կարող։
