Ինչո՞ւ են աղմկում մերժվածները: Պատասխանն ակնհայտ է՝ կորցնում են վերջին խրամատը, որ դեռ պայքարում էր հանուն յուրայինների։ Իհարկե, չենք կարող ժխտել՝ պրոցեսը ցավոտ է, իսկ ապագան կանխատեսելի՝ կորցնում են ազդեցության ոլորտներից ևս մեկը՝ Սահմանադրական դատարանն ու վերջին դիրքապահ Հրայր Թովմասյանին, ուստի պայքարում են գոնե աղմկելով։
«Պետականության քայքայման գործընթացն անխուսափելիորեն բերելու է անդառնալի կորուստների, որոնցից խուսափելու միակ ճանապարհը Նիկոլ Փաշինյանի հեռացումն է իշխանությունից»,- փորձում է լսելի դառնալ ՀՀԿ-ն։
«Օրվա քաղաքական իշխանությունը հետևողականորեն արհամարհում է երկրի Մայր օրենքը և, ելնելով անձնական ու քաղաքական շահախնդրությունից, իրականացնում է կամակատար դատարան ունենալու ցանկությունը»,- հայտարարում է տարիներ շարունակ երկիրը հարստահարած վարչախմբի անօրինականությունները լեգիտիմացրած ՀՅԴ-ն։
Իսկ նոր «Հայրենիք» ստեղծող Վանեցյանը «Իմ քայլը» խմբակցության պատգամավորներին սթափության կոչեր անելուց զատ, հանդես է եկել «Սահմանադրական վերականգման կոմիտե» ձևավորելու նախաձեռնությամբ։
Ասել է թե՝ ճակատագրական ռազմաճակատում գործի են դրվել արսենալում եղած բոլոր միջոցները, քանզի արդարադատության ձեռքը հնարավոր է, որ մի օր էլ իրենց դուռն է թակելու։ Տարակուսելի է միայն մի բան՝ տարիների փորձն անգամ չի հուշել, որ նման գործիքակազմով և ջղաձգումներով ժողովրդին հիշեցնում են, որ բարիկադների մյուս կողմում մերժվածներն են։
Քրիստինե Հովսեփյան
