Երրորդ ճանապարհի ջատագով Էդմոն Մարուքյանը հայտնվել է երկու քարի արանքում։ Կամ միանում է ԲՀԿ խմբակցության ստորագրահավաքին (ասել է թե ՀՀԿ-ին, ՀՅԴ-ին, Վանեցյանին և հայտնի փեսա Միքայել Մինասյանին) և դիմում են Սահմանադրական դատարան՝ պարզելու առաջարկվող փոփոխությունների համապատասխանությունը ՀՀ Սահմանադրությանը, կամ ընտրում է ձեռնպահի իր արդեն բնական կարգավիճակը, քանզի նախագահ Արմեն Սարգսյանի կողմից ձեռնարկվելիք քայլերի վրա հույս դնել այլևս չի կարող։
Հատկանշական է, որ հարցի վերաբերյալ մի փոքրիկ պարզաբանում է արել ԼՀԿ առաջամարտիկ Դավիթ Խաժակյանը։ Վերջինս համացանցային համառոտ, բայց խոսուն գրառմամբ հստակեցրել է, որ՝ «ԲՀԿ խմբակցության 26 ստորագրություններով դիմումը դեռ չկա, ինչի տակ ստորագրենք։ Դիմումը կլինի, մնացածի մասին կխոսենք»։ Իսկ մինչ այդ՝ սպասում են դիմումին՝ կից 26 ստորագրություններով։
Հետաքրքիր է՝ Խաժակյանն ակնարկում է, որ բարգավաճները հապաղում են, թեև դեռ երեկ վերջինները խոսում էին «երկրում իրավական անվտանգությունը պաշտպանելու և սահմանադրական կարգի տապալումը կանխելու» մասին…
Ամեն դեպքում՝ ԼՀԿ-ն կարևոր ընտրության առաջ է և ունի միայն մեկ ճանապարհ հստակեցնելու, թե ո՞ւմ շահերն է սպասարկում կուսակցությունը։
Քրիստինե Հովսեփյան
