SHAMSHYAN.com-ի տեղեկություններով հունիսի 21-ին ժամը 22։40-ի սահմաններում ոստիկանության Երևան քաղաքի վարչության 102 օպերատիվ կառավարման կենտրոն ահազանգ է ստացվել, որ Մալաթիա-Սեբաստիա վարչական շրջանի Տիչինայի փողոցում մոտ 40 հոգով ծեծի են ենթարկել Հայկ Ստեփանյանին՝ հայտնի որպես «Հեղափոխության պահապաններ» նախաձեռնության հիմնադիր։
Տեղին է ասել՝ լինելու բանը մի օր լինելու էր, քանզի այս նախաձեռնության կամ խմբակի, կամ «լավ տղերքի» գործելաոճը նմանատիպ վերջաբանի մասին վաղուց էր գուժում։ Թերևս պետք է պարզել, թե ո՞վ է լիազորել «պահապան հրեշտակներին» «սամասուդ» իրականացնել և վարկաբեկել իրական հեղափոխությունը։
Հատկանշական է, որ դեպքի պաշտոնական վարկածն անգամ կասկածներ է առաջացնում՝ ինչպե՞ս է ստացվել, որ 40 հոգով հենց այնպես հարձակվել են մի «օրենքի պահապանի» վրա, որ չգիտես ինչու կեսգիշերին մոտ հայտնվել է Տիչինայի փողոցում։ Հարկավ՝ մեզ հասած ուշագրավ տեղեկություններով ծեծին նախորդել է հետաքրքիր նախաբան։
Պարզվում է՝ դեռ կեսօրին, ինչպես ժողովուրդն է ասում, «քեֆները հազար» Աշտարակի ձորի կողմից եկող «պահապանները» իրենց իրավունքների սահմանում են համարել կանգեցնել մայրուղով ընթացող նիվա մակնիշի ավտոմեքենան, որում եղել են երիտասարդներ և, մեղմ ասած, հանդիմանել արագ ընթացքի համար։ Երիտասարդները հակադարձել են, որ վարում են թույլատրելի արագությամբ և հաշվետու չեն վերջինների առաջ։ Ծավալված վիճաբանության ընթացքում ինքնակոչ «իրավապահներին» միացել են մի քանի այլ ավտոմեքենաներով երիտասարդներ և ծեծի են ենթարկել նիվայի ուղևորներին։ Հնարավոր է, որ այստեղ ամեն բան ավարտվեր, սակայն Հայկ Ստեփանյանը որոշել էր սկսածն ավարտին հասցնել երեկոյան, ուստի կրկին զանգահարել է հակառակ կողմի մասնակիցներից մեկին և հանդիպում է պահանջել։ Արդյունքում՝ ծեծված Ստեփանյանը ստիպված է եղել դիմելու Ոստիկանություն, քանի որ ինքը պարզապես ՀՀ շարքային քաղաքացի է։
Քրիստինե Հովսեփյան
