Եվ այդուամենայնիվ, ԼՀԿ-ն՝ Էդմոն Մարուքյանի գլխավորությամբ, գտավ երրորդ ճանապարհը՝ կդիմի Սահմանադրական դատարան ՀՀ երկրորդ նախագահ Ռոբերտ Քոչարյանի դիմումի քննությունն ավարտվելուց հետո։
«Հենց այն օրը, որ խորհրդարանը քննարկում էր Սահմանադրական փոփոխությունների նախագիծը Սահմանադրական դատարանը աշխատակարգային նիստ է արել և որոշում է ընդունել, որ երկրորդ նախագահին առնչվող գործն իրենք կքննեն հուլիսի 7-ին, այսինքն ինչ-որ ժամկետ է առաջ բերվել՝ կասեցված գործը հանվել է և նշանակվել է օր։ Հենց այն օրը, երբ այստեղ քննարկվում է Սահմանադրական փոփոխությունների նախագիծը»,- նշում է Էդմոն Մարուքյանը՝ հավելելով, որ երեկ Քոչարյանի փաստաբանական խմբից հարցազրույցում ասել են՝ սա արվում է, որ միջամտություն լինի ՍԴ-ում քննվող գործի հետ կապված։
Փաստորեն՝ երեկ ՍԴ դատավորների և Հրայր Թովմասյանի պնդումներն առ այն, որ Ռոբերտ Քոչարյանին վերաբերվող հարցն օրակարգում ավելացվել է միայն հունիսի 18-ին Վենետիկի հանձնաժողովի կարծիքի հրապարակվելուց հետո և օրենքի համաձայն Դատարանը պարտավոր է անհապաղ վերսկսել կասեցված գործը, հավատ չեն ներշնչել լուսավորներին, ինչն էլ հանգեցրել է նման որոշման։
Մարուքյանի խոսքով՝ իրենք երբեք Քոչարյանի գործի մասով չեն խոսել, թույլ են տվել, որ իրավական գործընթացներն իրենց հունով ընթանան և քննարկումների արդյունքում որոշել են ՍԴ դիմել հուլիսի 7-ից հետո։ Նա նկատում է, որ Ռոբերտ Քոչարյանի գործը քննվում է գրավոր ընթացակարգով, որը նախատեսում է շատ արագ որոշում, իսկ խմբակցությունները կաշկանդված չեն ժամկետներով, ուստի խմբակցությունը կաշխատի դիմումի վրա և կդիմի ՍԴ միայն երկրորդ նախագահի գործով նիստից հետո։
Քրիստինե Հովսեփյան
