Փաստորեն ԲՀԿ-ի շտապողականությունը հեչ կապ չուներ երկրում իրավական անվտանգությունը պաշտպանելու և սահմանադրական կարգի տապալումը կանխելու հետ։ Այսպիսի տպավորություն է ստեղծվում ԲՀԿ պատգամավորների այսօրվա արձագանքները դիտարկելուց հետո՝ ամեն ինչ արվեց ՀՀ երկրորդ նախագահ Ռոբերտ Քոչարյանին աջակցելու և գործի քննությունը բարեհաջող ավարտին հասցնելու համար (ստորագրահավաք, երկար բանակցություններ պատգամավոր գործընկերների հետ), որին պետք է միանար նաև «Լուսավոր Հայաստան» խմբակցությունը, բայց նախընտրեց չմիանալ։
Իսկ որ ՍԴ դիմելու հարցում հուլիսի 7-ի նիստը շատ է կարևորվել, պարզ է դառնում ԲՀԿ պատգամավոր Գևորգ Պետրոսյանի՝ «Ա1+»-ի հետ զրույցից։ Պատգամավորը շեշտել է, որ հուլիսի 7-ից հետո դիմելն անիմաստ է, քանի որ «իրենք իրենց սովորության համաձայն կարող են արտահերթ նիստ գումարել, անմիջապես բերել իրենց ուժերով մի քանի հոգի նշանակել ՍԴ անդամ, հետևաբար՝ դրանից հետո ՍԴ դիմելն անիմաստ է»։
Չդիմացավ և Նաիրա Զոհրաբյանն էլ «հանդիմանեց» էս ամենի «ամենամեծ մեղավորին»՝ աղմկահարույց օրենքը ստորագրած Արմեն Սարգսյանին։ Վերջինս նկատում է՝ նախագահը «մի քանի ոսկե հնարավորություն ուներ ապացուցելու, որ տարբերվում է ղեկավարման գեղցի ու հիստերիկ տեսակից», բայց նախընտրեց «դասալիքի» ճանապարհը…
Ուշագրավ է, որ թեև Ծառուկյանին պատկանող կուսակցությունը խոսակցությունների մակարդակում միշտ կապվել է Ռոբերտ Քոչարյանի անվան հետ, բարգավաճները հիմնականում խուսափել են նախագահի դատավարության մասով մեկնաբանություններ անելուց՝ պատճառաբանելով, որ գործը գտնվում է իրավական տիրույթում։ Սակայն վերջին իրադարձությունները կարծես թե ընձեռեցին հնարավորություն վերջիններին ընդգծված ընդդիմադիր կեցվածք ընդունելու, այդ թվում նաև Քոչարյանին «քաղհալածյալ» ճանաչելու համար։ Ուստի Սահմանադրական դատարանի շուրջ ծավալված գործընթացները հարմար առիթ կարող էին դառնալ փոքրիկ, բայց ծանրակշիռ միջամտություն անելու համար։ Ինչևէ՝ գործադրված ջանքերը չարդարացվեցին, բայց միանշանակ նկատվեցին համապատասխան շրջանակների կողմից։
Քրիստինե Հովսեփյան
