Անդրադառնալով ՍԴ դատավոր Ալվինա Գյուլումյանի երեկ հնչեցրած մեկնաբանություններին՝ «Իմ քայլը» խմբակցության ղեկավար Լիլիթ Մակունցը նշել է․«Ես կարծում եմ՝ այդ բոլոր մեկնաբանություններին շատ ավելի հստակ պատասխաններ կտան, իհարկե, իրավաբանները, բայց նաև իր նշած մեկնաբանությունների դաշտում հարց է առաջանում, եթե դա այդպես է, չնայած նախագիծն այլ կարգավորում է նախատեսում, ապա ինչպես է ստացվում, որ տիկին Գյուլումյանը Եվրոպական դատարանի դատավոր աշխատելուց հետո դատական կարգի միջոցով նաև պահանջել է հավելավճար»։
Հիշեցնենք՝ տիկին Գյուլումյանը լրագրողների հետ զրույցում շեշտել էր, որ նախագիծն իր վրա չի ազդում, քանի որ չի լրացել իր պաշտոնավարման 12 տարին։
Հատկանշական է, որ ԱԺ պետաիրավական հանձնաժողովի նախագահ Վլադիմիր Վարդանյանը նույնպես խոսել է հարցի շուրջ։ Գյուլումյանի այն հայտարարությանը, որ ինքը պատրաստ է իր իրավունքները վիճարկել ընդհուպ ՄԻԵԴ-ում, Վարդանյանը պատասխանել է, որ յուրաքանչյուրի իրավունքն է սպառել ներպետական ատյանները, հասնել ընդհուպ ՄԻԵԴ, բայց սպառնալ դրանով, անընդունելի է։
«Երբ տիկին Գյուլումյանին պետք է, որ այդ պաշտոնն անընդհատ դիտարկվի աշխատավարձի հետ կապված, թոշակի հետ կապված, նա դիտարկում է որպես անընդհատ պաշտոն, երբ անհրաժեշտ չէ, հարմար չէ, ձեռնտու չէ, դիտարկում է որպես ընդհատյաց պաշտոն»,- ասել է Վարդանյանը։
Քրիստինե Հովսեփյան
