«Իմ քայլը» խմբակցության պատգամավոր, ԱԺ պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանը այսօր՝ ԱԺ արտահերթ նիստի ժամանակ հայտարարեց.
«Վերջին ժամանակներս սկսեցին անընդհատ հայտնվել բայղուշներ և անել բայղուշություններ: Առաջին մեծ բայղուշությունն ինձ համար արեց հայոց համազգային փեսան, երբ իր սերիալներից մեկում անդրադարձ կատարեց անվտանգության ոլորտին և մեր բանակի վերջին ձեռքբերումներին»:
Քոչարյանի կարծիքով Սուրբ աթոռում Հայաստանի նախկին դեսպան, Սերժ Սարգսյանի փեսա Միքայել Մինասյանի այդ հայտարարությունը սպառնալիք է ՀՀ անվտանգությանը:
«Հասանք այն աստիճանի, որ պատերազմող երկրի հակառակորդին նույնիսկ հուշեցին, որ կարող են նաև սկսել հարձակումներ: Ես ուզում մեր այդ ընկերներին հիշեցնել, որ դուք, ըստ էության, պատերազմ եք հայտարարում մեր սեփական ժողովրդին, բայց դուք այդ պատերազմն արդեն պարտվել եք, որովհետև այսօրվա մեր երկրի անվտանգությունն ապահովում է լեգիտիմ մեծամասնությունը, որն իր քվեով արդեն 2-րդ քվեարկությամբ ցույց տվեց, որ մեր երկիրը գտնվում է քաղաքական լուրջ անվտանգային ամուր, կայուն հիմքերի վրա»,- ասաց Անդրանիկ Քոչարյանը:
