Քիչ առաջ պաշտոնական տեղեկագրում ԱԺ նախագահ Արարատ Միրզոյանը հրապարակել է Հայաստանի Հանրապետության Սահմանադրության փոփոխությունները:
Դրանք արդեն համարվում են ուժի մեջ մտած:
Հիշեցնենք՝ ՀՀ նախագահ Արմեն Սարգսյանը հունիսի 24-ին ստորագրել էր մի շարք օրենքներ, որոնց թվում էր նաեւ ԱԺ-ում քննարկված եւ ընդունված ԱԺ կանոնակարգ սահմանադրական օրենքում փոփոխություններ եւ լրացումներ կատարելու մասին, «Սահմանադրական դատարանի մասին» սահմանադրական օրենքում լրացումներ կատարելու մասին օրենքների փաթեթը:
Սահմանադրության փոփոխությունների ուժի մեջ մտնելու համար մնացել էր միայն 1 քայլ՝ ԱԺ նախագահը պետք է հրապարակեր դրանք:
Հիշեցնենք, որ Սահմանադրության 213 հոդվածում կատարված այդ փոփոխությունների արդյունքում ՍԴ նախագահ Հրայր Թովմասյանը դառնում է ՍԴ անդամ, 12 տարուց ավելի պաշտոնավարած ՍԴ անդամներ Ալվինա Գյուլումյանը, Ֆելիքս Թոխյանը եւ Հրանտ Նազարյանը գնում են թոշակի: Երկամսյա ժամկետում ՀՀ նախագահը, Կառավարությունը եւ Դատավորների ընդհանուր ժողովը առաջադրում են ՍԴ անդամների թեկնածություններ, որոնք ԱԺ կողմից ընտրվելուց հետո փոխարինում են թոշակի գնացած դատավորներին:
