Կորոնավիրուսի պանդեմիայի պայմաններում, թեև կառավարությունը պահանջում է դիմակներ կրել՝ հիմնավորելով, որ դա կենսական անհրաժեշտություն է, այսուհանդերձ կան քաղաքացիներ, որոնք անտեսում են պարետի որոշումները: Ցավալի է, որ այդ քաղաքացիները հաճախ լինում են պատգամավորներ, ավագանու անդամներ, մի խոսքով մարդիկ, որոնք պետք է օրինակ ծառայեն ուրիշների համար:
Երեկ Երևանի քաղաքապետ Հայկ Մարությանը անջատեց ավագանու անդամ Թեհմինա Վարդանյանի խոսափողը՝ հիմնավորելով, որ նա դիմակ չկրելով վտանգում է ուրիշների կյանքը: ԱԺ ԲՀԿ խմբակցության պատգամավոր Գևորգ Պետրոսյանը ևս բազմիցս տուգանվել է դիմակներ չկրելու համար, սակայն շարունակում է անել նույնը:
Ցավալի է, որ դիմակ կրելու երևույթը դարձել է ընդդիմության ձեռքին շահարկման առարկա, և մարդիկ, վնասելով իրենց և իրենց մտերիմների առողջությունը, դիմակների հակաքարոզչություն են իրականացնում: Ընդդիմության ներկայացուցիչները շահարկում են այն փաստարկը, որ դիմակ կրելը առաջացնում է թոքերի սունկ կամ հիպոքսիա, սակայն մինչ այժմ որևէ գիտական ապացույց չկա, որ դա այդպես է:
Կարող ենք արձանագրել մեկ այլ քարոզչական աղետ, երբ ընդդիմությունը փորձում է դիմակ կրող քաղաքացիներին պիտակավորել որպես «զոմբիների»: Եթե ուշադրություն դարձնենք, ապա ընդդիմադիր մեդիայի եթերում գրեթե չենք տեսնի դիմակ կրող քաղաքացիների: Ժողովրդի կողմից բարձր լեգիտումություն ունեցող իշխանության ներկայացուցիչների որոշումները չպետք է շահարկման առարկա դառնան, առավելևս եթե դրանք վերաբերում են մարդկանց կյանքին և առողջությանը:
Հարկ է գիտակցել, որ Հայաստանը ո՛չ առաջին և ո՛չ էլ վերջին երկիրն է, որտեղ պարտադիր է դիմակ կրել, և սա այն որոշումներից է, որին պարտավոր են հետևել բոլորը՝ անկախ իրենց վերաբերմունքից և քաղաքական հայացքներից:
Եթե ժամանակին չսթափվենք, հետո ուշ է լինելու:
Նելլի Խաչատրյան
