Հաշվի առնելով համաճարակային իրավիճակը մեր երկրում՝ որոշում է կայացվել կրծքավանդակի CT հետազոտության արժեքն այսուհետ 45.000 դրամից սահմանել 25.000 դրամ: Այս մասին հայտնում է Երեւանի Մխիթար Հերացու անվան պետական բժշկական համալսարանի ռեկտոր Արմեն Մուրադյանը:
«Ելնելով ստեղծված համաճարակային իրավիճակից և հաշվի առնելով Сovid-19-ով պայմանավորված թոքաբորբերի վաղաժամ հայտնաբերման ժամանակ ՀՏ (CT) հետազոտության բարձր ինֆորմատիվությունը, նպատակ ունենալով ապահովել հետազոտության մատչելիությունը բնակչության համար՝ «Հերացի» թիվ 1 հիվանդանոցային համալիրում կրծքավանդակի ՀՏ հետազոտության արժեքն այսուհետ 45.000 դրամից սահմանվել է 25.000 դրամ:
Հետազոտությունը կատարվում է վերջին սերնդի 2019թ. արտադրության GE revolution սարքով:
Ծառայությունն իրականացվում է՝ պահպանվելով անվտանգության բոլոր կանոնները:
Հերթագրման համար նախօրոք զանգահարել 010 56 01 00 հեռախոսահամարով: Հետազոտությանը ներկայանալ դիմակով, ձեռնոցներով, պահպանել սոցիալական հեռավորություն և հնարավորինս առանց հարազատների ուղեկցության:
Հիշեցնենք, որ գերժամանակակից սարքը ԵՊԲՀ-ին նվիրել է անվանի բժիշկ, բարերար Լևոն Նազարյանը: Պրոֆեսորը կարևորում է Երևանի պետական բժշկական համալսարանի զարգացումը, քանի որ այն կրթում է նոր սերունդը, որն ապագայում պիտի աշխատի և ծառայի Հայրենիքին։
Սիրելի քաղաքացիներ, օգնեք մեզ. պահպանեք համաճարակային բոլոր կանոնները, որպեսզի առողջ լինենք»,- գրել է Մուրադյանը:
