ՀՀ ԱԺ պատգամավոր Ռուբեն Ռուբինյանը ֆեյսբուքյան գրառմամբ արձագանքել է Ադրբեջանի նախագահ Ի. Ալիեւի՝ ՀՀ իշխանությունների վերաբերյալ հայտարարություններին: Նա նաեւ նշել է, որ Ալիեւի հայտարարությանն ի պատասխան Սերժ Սարգսյանը քննադատել է թե՛ Ադրբեջանի, թե՛ Հայաստանի ներկա իշխանություններին:
«Ադրբեջանի բռնապետ Իլհամ Ալիևը ցնդաբանություններով լի ելույթ է ունեցել, որտեղ ստերով լի անդրադարձներ է արել Հայաստանի նախկին և ներկա իշխանություններին՝ փորձ անելով օգտագործել մեր և մեր նախկին իշխանությունների միջև առկա վեճերն իր կեղտոտ օրակարգն առաջ մղելու համար։
Սրանից հետո Սերժ Սարգսյանն, իր հերթին, հայտարարություն տարածել, որն ամբողջությամբ և հավասարապես նվիրել է Իլհամ Ալիևին և Նիկոլ Փաշինյանին քննադատելուն։
Ես չեմ կրկնի Սերժ Սարգսյանի սխալը և ուղղակի կասեմ, որ Հայաստանը ժողովրդավարական պետություն է, որն անդառնալիորեն բռնել է տնտեսական, սոցիալական և ռազմական զարգացման ճանապարհը, և թող որևէ հետադիմական բռնապետի մտքով անգամ չանցնի, որ կարող է իր նավթոտ քիթը խոթել մեր երկրի գործերի մեջ կամ մեզ սպառնալ։
Կեցցե՛ ազատ Արցախը»,- գրառել է պատգամավորը։
Հիշեցնենք, որ րոպեներ առաջ Ի. Ալիեւի հայտարարությանն էր անդրադարձել նաեւ ԱԺ «Իմ քայլը» խմբակցության ղեկավար Լիլիթ Մակունցը:
