Գագիկ Ջհանգիրյանը՝ ՍԴ դատավորների թեկնածուների շարքում

Վերջին օրերին Սահմանադրական դատարանի նոր դատավորների ընտրության հարցը մամուլի ուշադրության կենտրոնում է։ Շահարկվող անունների կողքին առավել շատ խոսվում է Գագիկ Ջհանգիրյանի թեկնածության մասին, թեպետ նախկին պատգամավորը նման տեղեկություններն անլուրջ է համարում։

Պետք է նկատել, որ հասարակության մի հատվածը կտրուկ դեմ է Ջհանգիրյանի առաջադրվելուն և կարծում է, որ նրա՝ ՍԴ դատավոր դառնալու դեպքում, կրկին կունենանք օրվա իշխանությունների կամակատար Դատարան, իսկ մի հատվածն էլ նշում է՝ եթե Գագիկ Ջհանգիրյանը ցանկանում է օգտակար լինել երկրին, թող բացահայտի հոկտեմբերի 27-ի գործը։

«Օդից կախված լուրերին» կոշտ գրառմամբ է անդրադարձել քաղտեխնոլոգ Կարեն Քոչարյանը՝ նշելով, որ ՍԴ դատավոր են ուզում նշանակել Հայաստանում «ընտրակեղծիքների պապային»։

«Մի մարդու, ով, օդում կախված լուրերի համաձայն, 1995թ. բանալիով փակել է Ռոբերտ Ամիրյանին (ով այդ պահին ԿԸՀ նախագահն էր), որպեսզի ԱԺ ամբիոնից ինքը կարդա ընտրությունների և հանրաքվեի «արդյունքները»։ Մի մարդու, որ դեռևս 2000 կամ 2001թ. այդ նույն ԱԺ ամբիոնից հայտարարեց, որ ինքը չի կարող խոսել հոկտեմբերի 27-ի մասին, քանի որ պաշտոնյա է։ Ամեն ինչ կասի այն ժամանակ, երբ պաշտոն չունենա։ 2008-ից նա որևէ պաշտոն չի զբաղեցնում, սակայն մինչ օրս ոչինչ չի ասել»,- գրել է Քոչարյանը։

Չի հաստատել և չի հերքել մամուլի դիտարկումներն իմքայլական պատգամավոր Նիկոլայ Բաղդասարյանը. «Տարիքային ցենզ կա, որ պետք է 40 և բարձր տարիք ունենա ՍԴ անդամը, նա համապատասխանում է այդ պահանջին։ Նա նաև ունի բարձրագույն կրթություն, այսինքն՝ համապատասխանում է պահանջներին, այլ հարց է՝ նրան կառաջադրե՞ն, թե՞ ոչ»։

Քրիստինե Հովսեփյան