Այս տարի աննախադեպ ծավալի նոր կառուցվող և վերակառուցվող բուժհաստատություններ ենք ունենալու: Այս մասին Կառավարության այսօրվա նիստում հայտնեց առողջապահության նախարար Արսեն Թորոսյանը:
«Բացառությամբ այն 12-ի, որ քաղաքաշինության կոմիտեի կողմից իրականացվում են, մենք ևս 2 խոշոր օբյեկտ ունենք Համաշխարհային բանկի շրջանակներում կառուցվելիք: Դրանցից առաջինի՝ Մարտունու ԲԿ-ի շինարարությունը կսկսվի մոտ օրերս: Շուտով կհայտարարվի նաև Վայոց Ձորի ԲԿ-ի ամբողջական կառուցման մրցույթը: Այս երկուսը ամբողջությամբ զրոյից են կառուցվելու և համապատասխանելու են միջազգային բոլոր չափանիշներին: Եվս մեկ հրատապ շինարարություն հնարավորություն կունենանք շուտով անելու: Սպասում ենք Կայունացման և զարգացման եվրասիական հիմնադրամի կողմից համաձայնագրի կնքմանը: Կորոնավիրուսով պայմանավորված՝ Վանաձորում կառուցելու ենք նոր իֆեկցիոն հիվանդանոց: Վանաձորի ԲԿ հին շենքը ոչ հնարավոր էր վերանորոգել, ոչ էլ համապատասխանում էր պայմաններին»,- նշեց նախարարը:
Արսեն Թորոսյանն ընդգծեց՝ այս ամբողջն անելուց հետո ամբողջ ՀՀ տարածքում պրակտիկորեն չեն ունենալու որևէ բժշկական հիմնարկ, որը կարիք կունենա էական ներդրման կամ կապիտալ վերանորոգման: Նախարարի խոսքով՝ այս ամենը կիրագործվի 2-3 տարում։
