Ամուլսարի շուրջ տեղի ունեցողն անհանգստության նոր ալիք է բարձրացել, հատկապես համացանցային տիրույթում բուռն քննարկումներ են ծավալվում։ Խնդրի շուրջ հետաքրքիր փաստեր և ժամանակագրություն է ներկայացրել Facebook-յան օգտատեր Դավիթ Աթայանը՝ մատնանշելով այն պատասխանատուներին, որոնք ապահովեցին Լիդիան Արմենիայի աշխատանքների շարունակականությունն Ամուլսարում։
Այսպիսով՝ 2006 թվականի հետախուզական աշխատանքների համար թույլտվությունը տրվել է Ռոբերտ Քոչարյանի օրոք։ Այդ շրջանում Վարդան Այվազյանը գլխավորում էր ՀՀ բնապահպանության նախարարությունը, և վերջինիս կողմից հաստատվել է հետախուզական աշխատանքների թույլտվությունը։
Արդեն 2009 թվականին՝ Սերժ Սարգսյանի նախագահության շրջանում, Լիդիանը ստացել է շահագործման թույլտվություն և տարածքն ընդլայնելու իրավունք, իսկ Բնապահպանության նախարար Արամ Հարությունյանը (նույն ինքը՝ բուլկի Արամը, ում հետ կապված է աղմկահարույց կոռուպցիոն գործարքը) հաստատել է այդ փաստաթուղթը։
2012 թվականին Լիդիանը ստացել է երկրորդ թույլտվությունը որոշ վերապահումներով՝ Ամուլսարի հանքավայրը շահագործելու համար։
2013-2014 թվականներին գնդեվազցիները 200 ստորագրությամբ դիմել են Միջազգային ֆինանսական կորպորացիայի օմբուցմենի գրասենյակ և պատասխան են ստացել 2017-ին։ Պետք է նկատել՝ Ջերմուկ քաղաքի ու Ջերմուկ բրենդի վրա միջազգային ստանդարտների խախտման տնտեսական ռիսկերը գնահատված չեն։
2015 թվականին Գնդեվազի բնակիչները և երկու բնապահպանական հասարակական կազմակերպություններ դատի են տվել Կառավարությանը։ 2016 թվականին Բնապահպանության նախարար Արամայիս Գրիգորյանը, գաղտնի, առանց հանրային քննարկումներ անցկացնելու, հաստատել է Լիդիան Արմենիայի կողմից երեք անգամ փոխված սարի շահագործման ծրագիրը։
2017 թվականին նախարար Արծվիկ Մինասյանը հաստատել է Ջերմուկ ազգային պարկի ծխրագիրը առանց Ամուլսարի։
2018 թվականին Կարեն Կարապետյանի օգնական Էրիկ Գրիգորյանը նշանակվեց ՀՀ բնապահպանության նախարար, ով մինչ օրս լռում է այսքան աղմուկ բարձրացրած խնդրի կոռուպցիոն ողջ մեխանիզմների մասին և որևէ դիրքորոշում չհայտնեց Ամուլսար գնացող ճանապարհը փակած մարդկանց գործողությունների և պահանջի վերաբերյալ։
2019 թվականին հարուցվեց քրեական գործ։ ԷԼԱՐԴԻ ուսումնասիրության համաձայն բացահայտվեց, որ Լիդիանի փաստաթղթերն ամբողջական չեն։ Նաև պարզվեց, որ քննիչ Իվանյանը նախարար Արամայիս Գրիգորյանի հորեղբոր տղան է։ 2020 թվականին քրեական գործը դեռ քննության փուլում է, իսկ ՎԶԵԲ-ը գրանցեց ջերմուկցիների բողոքը։
Քրիստինե Հովսեփյան
