Կորոնավիրուսի տարածումը կանխելու և համաճարակի հետևանքները վերացնելու ուղղությամբ Կառավարության և պարետատան իրականացրած աշխատանքների ուսումնասիրության նպատակով խորհրդարանական ընդդիմությունը ձևավորել է ժամանակավոր հանձնաժողով, որը կգլխավորի «Լուսավոր Հայաստան» խմբակցության պատգամավոր Արկադի Խաչատրյանը։
Հանձնաժողովի նպատակն է ավելի ամբողջական և համակողմանի պատկեր ձևավորել, հասկանալ՝ ինչպիսի աշխատանքներ են կատարվել, արդյոք ձեռնարկված միջոցառումները եղել են հասցեական և ճիշտ ժամանակին։ Հանձնաժողովը պետք է նաև յուրատեսակ հարթակ հանդիսանա, որը հնարավոր կդարձնի քննարկումներ կառավարության այն անդամների հետ, ովքեր որոշակի պատասխանատվություն են կրել համավարակի դեմ տարվող աշխատանքների իրականացման համար, ինչպես նաև ուսումնասիրության առարկա են դառնալու այլ երկրներում իրականացված հակահամաճարակային գործընթացները։։
Քննիչ հանձնաժողովը բաղկացած է լինելու 12 անդամից, խորհրդարանական բոլոր խմբակցություններից լինելու են ներկայացուցիչներ։ Քննվող հարցերի շրջանակը շատ ընդգրկուն է լինելու՝ ներառվելու են սոցիալ-տնտեսական, առողջապահական, նույնիսկ մարդու հիմնարար ազատություններին և իրավունքներին առնչվող հարցեր։ Նման գործողությունները միտված են ստանալու ամփոփ պատկեր, թե ինչպիսին են եղել կառավարության մոտեցումները համավարակի տարածումը կանխելու, հետևանքների մեղման կամ վերացման ուղղությամբ։
Քրիստինե Հովսեփյան
