Արտակարգ դրության պայմաններում հանրահավաքների սահմանափակումներից դժգոհող քաղաքական ուժերը առաջին իսկ հնարավորության դեպքում ի ցույց կդնեն իրենց քաղաքական օրակարգի և զինանոցի ողջ մերկությունը։ Վստահաբար կարող ենք արձանագրել, որ այլ բան է, երբ սեփական TV-ներով, ռադիոալիքներով, կայքերով ամենօրյա ռեժիմով գուժում ես երկրի կործանումը, և մեկ այլ բան է՝ այդ օրակարգի շուրջ հրապարակում հավաքել համախոհների։ Քանի որ նախկինները հակված են հավատալ իրենց մեդիայով տիրաժավորված աղբին, առաջին խորը հիասթափությունը կլինի դատարկ հրապարակներում միտինգի իմիտացիա ստանալը։
Քոչարյանի,Վանեցյանի,ՀՀԿ-ի, դաշնակների համակիրներին դժվար է պատկերացնել նույնիսկ Շառլ Ազնավուրի անվան հրապարակում։ Նրանց համար լավագույն վայրը կարող է լինել կառավարության դիմացի մայթը, որտեղ հնարավոր կլինի ապահովել խտություն և տպավորիչ կադրեր ստանալ:
ԲՀԿ-ն քիչ ավելի տպավորիչ արդյունքներ կգրանցի, եթե մի տեղում հավաքի «Մուլտի գրուպ»-ի կազմում գտնվող բոլոր հիմնարկների աշխատակիցներին, երկու կոպեկ կպցնելու եկած Ծառուկյանին աստվածացնող լաչառներին և հաստավիզ ախրանիկներին։ Ի դեպ, վերջիններս հարուստ փորձ ունեն խաղաղ ցուցարարներ ծեծելու՝ վկա 2008-ի և դրան հաջորդած բազմաթիվ իրադարձությունները։
Ընդդիմադիր դաշտում պարազիտացած այս զանգվածից ոչ մի կերպ հնարավոր չի լինելու կերտել պետության խնդիրներով մտահոգ լիդերների, իսկ հանրահավաքին ներկաներից՝ դժգոհ քաղաքացիների, քանզի անձնական շահը և գաղափարական մերկությունն այնքան ակնհայտ են, որ դժվար է թաքցնել ճռճռան պլակատների ետևում։
Օրվա իշխանություններն իրենց սխալներով, երբեմն աններելի անփութությամբ թույլ տված սխալներով, շարունակում են հանդիսանալ հեղափոխական փոփոխությունների, ժողովրդի ակնկալիքների գլխավոր երաշխավորը։
Ահա այստեղ է թաքնված Փաշինյանի ֆենոմենի գաղտնիքը։ Սևերի և սպիտակների մասին պնդումները հենց արժեհամակարգային տարբերության մասին է խոսում։
Երբ նժարին դրվում է նախկինների վերարտադրության հարցը, քաղաքական դաշտը, բոլոր տեսակի տարաձայնություններից զատ, բաժանվում է երկու մասի՝ հեղափոխական արժեքների կրողներ և մնացածը։
Այսպես կլինի այնքան ժամանակ, մինչև նախկինների կատաղի դիմադրությանն ու աննախադեպ ֆինանսական պատերազմներին փոխարինելու կգա մի երրորդ ուժ, որը հակակշիռ կլինի օրվա իշխանություններին և կհավակնի դառնալ հաջորդ իշխանությունը:
Հ.Գ Քաղաքացու քվեն պետք է ձևավորի իշխանություն, ուստի քաղաքացին պետք է վստահ լինի իր ձայնով և ընտրությունների միջոցով իշխանությունը փոխելու մեջ։
Էդգար Բաբայան
