Նախագահի պասիվ դերակատարումը կասկածների առիթ է տալիս. պատգամավոր

Այսօր՝ հուլիսի 7-ին, «Հանուն Հանրապետության» նախաձեռնության անդամները Հայաստանի Հանրապետության նախագահ Արմեն Սարգսյանի նստավայրի մոտ հանդես եկան կոչ-հայտարարությամբ։

«Կոչ ենք հղում առաջին հերթին նախագահին, որ նա ձեռնամուխ լինի Սահմանադրության 123-րդ հոդվածով իրեն վերապահված կարևորագույն գործառույթներին և շուտափույթ կերպով հայտարարի Սահմանադրական դատարանի թափուր տեղերի համար յուրաքանչյուր սահմանադրական մարմնի մեկական թեկնածուի առաջադրման գործընթացը և դրա վերաբերյալ խորհրդակցություններ սկսի մասնագիտական խմբերի, հասարակական կազմակերպությունների, առանձին մասնագետների հետ և դրանով էապես լիցքաթափի ներքաղաքական այս լարված իրավիճակը, որը, մեր համոզմամբ, մեծապես պայմանավորված է նաև Սահմանադրական դատարանի շուրջ առաջացած ճգնաժամով»,- հայտարարեց նախաձեռնության հիմնադիր, ԱԺ անկախ պատգամավոր Արման Բաբաջանյանը։

«Նախագահի ակտիվ դերակատարումը, ակտիվությունը այս հարցում ուղղակի պատասխանատու վերաբերմունք կլինի նրա սահմանադրական առաքելության իրագործման նկատմամբ և հարցեր չի առաջացնի»,- նշեց նա։