Կորոնավիրուսի դեմ պայքարում Հայաստանին օգնելու նպատակով՝ հատուկ չվերթներով Ֆրանսիայից Երևան է ժամանել բժիշկների 2 խումբ՝ հունիսի 14-ին և հունիսի 23-ին: Երկու դեպքերում էլ Սփյուռքի գործերի գլխավոր հանձնակատարի գրասենյակը եղել է համակազմակերպիչ,- տեղեկացնում է հանձնակատարի գրասենյակը:
Միջազգային առաքելությունների ֆիանասավորումը կատարվել է բացառապես միջազգային գործընկերների կողմից, և Հայաստանի կառավարությունը ֆինանսական որևէ ներգրավվածություն չի ունեցել այս գործընթացում: Այսպիսով՝ առաջին խմբի այցը հովանավորվել է USAID-ի, 2-րդինը՝ Հայաստանում Ֆրանսիայի դեսպանության կողմից:
Բժիշկների ժամանումը կազմակերպվել է ՀՀ առողջապահության նախարարության ակտիվ ներգրավվածությամբ: Առաջին խմբի ժամանման պարագայում Հայասանում ԱՄՆ դեսպան Լին Թրեյսին և Հայաստանում Ֆրանսիայի դեսպան Ժոնաթան Լաքոտը եղել են տեղեկացված, ունեցել են անմիջական ներգրավվածություն, օդանավակայանում դիմավորել են բժիշկներին: Երկրորդ խմբին օդանավակայանում դարձյալ դիմավորել է դեսպան Ժոնաթան Լաքոտը:
Հունիսի 23-ին դեսպանների մասնակցությամբ տեղի է ունեցել նաև մամուլի ասուլիս: Հունիսի 30-ին Ֆրանսիայի նախագահ Էմանուել Մակրոնը զորակցության նամակ է հղել վարչապետ Նիկոլ Փաշինյանին, որում մասնավորապես ասվել է. «Առաջիկա օրերին Ֆրանսիան կրկին Հայաստան կգործուղի կամավորական բժիշկների նոր թիմ, որը փոխարինման կգա արդեն իսկ ներկաներին, ովքեր իրենց հայ գործընկերներին օգնում են Covid-19-ի դեմ մղվող պայքարում»:
Ֆրանսիայի կառավարությունը ոչ միայն տեղյակ էր ֆրանսիացի բժիշկների Հայաստան այցից, այլ նաև ինչ-որ փուլում ներգրավված է եղել այդ աշխատանքներում։ «Արմենպրես»-ի հետ զրույցում այս մասին հյտնել է Սփյուռքի գործերի գլխավոր հանձնակատար Զարեհ Սինանյանը՝ հերքելով մամուլում շրջանառվող այն տեղեկությունը, թե, իբր, Ֆրանսիայի կառավարությունը տեղյակ չի եղել Հայաստան ժամանած ֆրանսիացի բժիշկների այցից։
