Հարցազրույց ամերիկագետ Սուրեն Սարգսյանի հետ

Պարոն Սարգսյան, օրեր առաջ Սպիտակ տան մամուլի խոսնակը իր ելույթում արտաբերեց  «Հայոց Ցեղասպանություն»  եզրույթը, ինչին իր արձագանքը տվեց նաև Թուրքիան, ըստ Ձեզ այս ամենը պատահականությո՞ւն է:

-Ցեղասպանության եզրույթն օգտագործելով մամուլի քարտուղարը երևույթ չէր նկարագրում, այլ նկարագրում էր այն հուշակոթողը, որը վանդալիզմի է ենթարկվել և, ըստ էության մի քանի օր անց Սպիտակ տունը նորից հայտարարություն տարածեց՝ ասելով, որ  ցեղասպանության հարցի վերաբերյալ Սպիտակ տան դիրքորոշումը չի փոխվել և Միացյալ նահանգները մնացել է իր տեսանկյունին և վարչակազմը չի ճանաչում հայոց ցեղասպանությունը:

Ի՞նչ ազդեցություն կարող է այս հայտարարությունը ունենալ թուրք –ամերիկյան կամ հայ- ամերիկյան հարաբերությունների վրա:

-Այս ամենը որևէ ազդեցություն չի կարող ունենալ Թուրքիա –ԱՄՆ հարաբերությունների վրա, որովհետև արդեն հայտարարվեց, որ դիրքորոշումը չի փոխվել, իսկ ինչ վերաբերում է հայ-ամերիկյան հարաբերություններին, ապա Արտաքին Գործերի Նախարարությունը զերծ մնաց որևէ ձևով հայտարարություն տարածելուց, որևէ բան ասելուց: Մասնավորապես ԱԳՆ խոսնակը նշեց, որ չի մեկնաբանում, սակայն իմ խորին համոզմամբ կարելի է առիթից օգտվել, մանավանդ, որ այս հարցը հայտնվել է ԱՄՆ մամուլի կենտրոնում և ևս մեկ անգամ կոչ անել, որպեսզի միջազգային հանրությունը ճանաչի հայոց ցեղասպանությունը: Ստացվում է՝ մենք երկու ամբողջ օր Միացյալ նահանգների լրատվադաշտի ուշադրության կենտրոնում էինք, բայց մեր ԱԳՆ-ն չկարողացավ օգտվել այդ հնարավորությունից և ինչ-որ մեսիջ հղել ԱՄՆ հանրությանը:

Համավարակի պայմաններում ԱՄՆ-Հայաստան համագործակցությունը ինչպե՞ս եք գնահատում:

-Համավարակի պայմաններում Միացյալ Նահանգները այն երկրներից էր, որը ուղղակի աջակցություն է ցուցաբերել  Հայաստանին տարբեր առիթներով ՀՀ-ում ԱՄՆ դեսպանատունը հաղորդագրություններ տարածեց, որ նրանք օգնել են Հայաստանին կորոնավիրուսի դեմ պայքարում: ԱՄՆ-ն տեսնում է որ համավարակի մասով, այս պահին Հայաստանում իրավիճակը բարդ է, և Հայաստանը ամենաբարդ համաճարակային իրավիճակ ունեցող երկրներին է դասվում:

Օրեր առաջ ԱՄՆ-ում բնակվող հայազգի աստղ Քիմ Քարդաշյանի ամուսինը՝ հայտնի ռեփեր Քայնե Ուեսթը հայտարարեց ԱՄՆ նախագահական գալիք ընտրություններին իր մասնակցության մտադրության մասին, ի՞նչ հնարավորություններ կան վերջինիս համար:

-Անդրադառնալով Քայնե Ուեսթի հայտարարությանը, կարող ենք ասել, որ ԱՄՆ-ում նման հայտարարություններ պարբերաբար լինում են, և պետք չէ լուրջ վերաբերվել այդ հայտարարություններին: Քայնե Ուեսթը որևէ հնարավորություն չունի Միացյալ Նահանգների նախագահ դառնալու համար, քանի որ չի կարող Հանրապետական կամ Դեմոկրատական կուսակցության պլատֆորմներով առաջադրվել որպես նախագահի թեկնածու: Նա կարող է որպես անկախ թեկնածու իր շանսերը փորձել, սակայն ես չեմ կարծում, որ շատ ձայներ կհավաքի, սակայն կարող է խանգարել հիմնական թեկնածուներից մեկի՝ Դեմոկրատ Ջո Բայդենին, իրենից կարող է ձայներ տանել, մասնավորապես աֆրոամերիկացիների և երիտասարդության ձայները հնարավոր է, որ հենց նրանից էլ Քայնե Ուեսթը տանի:

ԱՄՆ նախագահական ընտրություների վերաբերյալ այս պահին կանխատեսումներ կա՞ն:

-Ամերիկյան ընտրությունների վերաբերյալ կանխատեսումներ անելը չափազանց բարդ է, մանավանդ, որ նախընտրական պայքարը: Շանսեր ունի և՛ գործող նախագահ Դոնալդ Թրամփը, և՛ նրա մրցակից Ջո Բայդենը, այս փուլում կանխատեսում անելը անշնորհակալ և բարդ գործ է, պետք է սպասել մի քանի շաբաթ ևս և տեսնել, թե աջակցության ինչ ընդհանուր թվեր ունեն թեկնածուները և այդ ժամանակ ավելի հեշտ կլինի կանխատեսումներ անել:

Հարցազրույցը վարեց Նելլի Խաչատրյանը