Սահմանային լարվածության պայմաններում սովորաբար երկրներում ակտիվանում է ընդդիմության գործունեությունը, թեև պետք է հակառակը տեղի ունենար: Դրա վառ ապացույցը Բաքվում ամբողջ նախորդ գիշեր տեղի ունեցող ցույցերն էին, երբ մի խումբ ծայրահեղականներ, մեղադրելով Ադրբեջանի նախագահին անգործության մեջ, պահանջում էին իրենց երկրի Պաշտպանության նախարարի հրաժարականը՝ հորդորելով պատերազմ հայտարարել, իսկ իրենց թույլ տալ մեկնել առաջնագիծ:
Դատելով Բաքվի ոստիկանների կողմից գազային միջոցներով ցույցը ցրելու հանգամանքից՝ կարելի է ենթադրել, որ ցույցերը կազմակերպվել են տվյալ երկրի ընդդիմադիր ուժերի կողմից, որոնք պարբերաբար Ալիևին մեղադրում են անգործության և Ղարաբաղի քարտը իրեն պետք եղած ժամանակ խաղարկելու մեջ:
Կարևոր է արձանագրել, որ այս պահին հայ-ադրբեջանական սահմանում իրավիճակը հարաբերականորեն հանգիստ է:
Ըստ տարբեր միջազգային փորձագետների՝ Ադրբեջանը այս պահին պատրաստ չէ լայնամասշտաբ պատերազմի: Դրա մասին են վկայում վերջին օրերին նրա տարածքային, թանկարժեք տեխնիկայի, և բարձրաստիճան պաշտոնյաների կորուստները: Նախօրեին տեղի ունեցող ցույցերը իրականում վկայում են Ադրբեջանի թուլացած լինելու և ներքին պառակտվածության մասին:
Նման պայմաններում հարկ է գիտակցել, որ, ինչպես մենք ենք նկատում հակառակորդի ներքին պառակտվածությունը, նույնն էլ նկատում են նրանք, ուստի այս օրերին ընդդիմության ներկայացուցիչները պետք է զերծ մնան անհարկի արտահայտություններից և քաղաքական ակցիաներից:
Նելլի Խաչատրյան
