Հակառակորդի հրետակոծության ենթարկած Այգեպարի մանկապարտեզը վերանորոգվելու է Երևանի համայնքային միջոցներով:
Այս մասին «Ֆեյսբուք»-ի իր էջում գրել է Երևանի քաղաքապետ Հայկ Մարությանը:
«Քիչ առաջ հեռախոսազրույց ունեցա Տավուշի մարզպետ Հայկ Չոբանյանի հետ: Երեւանցիների անունից հայտնեցի, որ ամեն հնարավոր միջոցներով կանգնած ենք Տավուշի սահմանապահ ժողովրդի կողքին:
Մասնավորապես՝ պարոն մարզպետի հետ պայմանավորվածություն ենք ձեռք բերել, որ Երեւանի համայնքային միջոցներով կվերանորոգենք հակառակորդի հրետանային կրակից վնասված Այգեպարի մանկապարտեզը»,- ասված է քաղաքապետի գրառման մեջ:
Հիշեցնենք՝ ադրբեջանական ստորաբաժանումները գիշերվա ընթացքում դիվերսիոն ներթափանցման փորձ են արել, որը կանխել են հայկական ստորաբաժանումները: Թեժ մարտերից հետո ադրբեջանական ԶՈՒ-ն, կորուստներ կրելով, հետ է շպրտվել: Ավելի ուշ՝ Ժամը 05:20-ին, դարձյալ սկսել է հրետակոծել Այգեպար և Մովսես գյուղերը՝ կիրառելով ականանետ և Դ-30 հաուբից: Հարվածի տակ է առնվել նաեւ Այգեպարի մանկապարտեզը:
