Հայ-ադրբեջանական սահմանին տեղի ունեցող իրադարձությունները, Բաքվում օրեր առաջ տեղի ունեցող ցույցերը վկայում են Ադրբեջանում և Թուրքիայում տարվող հայատյացության մասին: Միջազգային հանրության հետ շանտաժի լեզվով խոսող Թուրքիան և Ադրբեջանը շարունակում են իրենց երկրների ներսում հայատյաց քաղաքականություն վարել՝ ներկայացնելով կեղծ պատմական տեղեկություններ իրենց բնակչությանը և աշխարհին:
Վերջերս Ադրբեջանի գիտական հանրությունը հայտարարություն էր տարածել՝ նշելով, որ չի աջակցի գիտության զարգացմանը աշխարհում, եթե միջազգային հեղինակավոր կառույցները չընդունեն իր տարածքային ամբողջականությունը Արցախի և յոթ հարակից տարածքների հետ:
Պատմական հայտնի և ակնհայտ փաստերի խեղաթյուրումը Ադրբեջանի կողմից ծիծաղ է առաջացնում նույնիսկ միջազգային հանրության մոտ, երբ Ադրբեջանի նախագահ Իլհամ Ալիևը նշում է, որ Երևանը իրենց պատմական տարածքն է: Ադրբեջանի իշխանությունները չեն հասկանում, որ նման հայտարարություններ անելով աշխարհը ևս մեկ անգամ տեսնում է, որ իրենց ներկայացրած փաստարկները իրականության հետ որևէ աղերս չունեն:
Թուրքիայի ԱԳՆ-ն այսօր Հայաստանին մեղադրել է Հարավային Կովկասում խաղաղությունը խաթարելու մեջ՝ մոռանալով վերջին օրերին «Սուրբ Սոֆիան» մզկիթ վերածելու իր գործողության մասին: Այսօր մեր կողքին Ադրբեջանում և Թուրքիայում մեծանում է սերունդ, որը պատրաստ է քնած հային կացնով խփողին ազգային հերոս սարքել, որը պատրաստ է աղավաղել պատմական ակնհայտ փաստեր, որը համարում է, որ իրենց ծանր սոցիալական վիճակը, երկրի գահավիժող տնտեսությունը հայերի պատճառով են:
Մի բան ակնհայտ է, որ նման սերունդ մեծացնելով Ադրբեջանի կառավարությունը հույս ունի շեղել իր քաղաքացիներին երկրում առկա իրական խնդիրներից՝ ժողովրդի աղքատության, իսկ ալիևյան կլանին՝ օրեցօր է՛լ ավելի հարստանալու փաստից:
Նելլի Խաչատրյան
