Ստամբուլը կրկին պատրաստվում է քաղաքապետի ընտրությունների

Դեռևս այս տարվա մարտ ամսին, երբ հարևան Թուրքիայի Ստամբուլ քաղաքում կայացան քաղաքապետի ընտրություններ, և արդյունքում քվեների 48,79%-ով հաղթեց ընդդիմադիր ժողովրդահանրապետական կուսակցության թեկնածու Էքրեմ Իմամօղլուն, Թուրքիայի նախագահ Ռեջեփ Թայիփ Էրդողանը հայտարարեց, որ իր ղեկավարած «Արդարություն և զարգացում» կուսակցությունը բոյկոտելու է քվեարկության արդյունքները, քանի որ ընտրություններն անցել են բազմաթիվ խախտումներով և օրինազանցություններով։ Արդյունքում երկրի Բարձրագույն ընտրական խորհուրդը չեղարկել էր ՏԻՄ ընտրությունների արդյունքները՝ քաղաքապետի նոր ընտրության օր նշանակելով հունիսի 23-ը, ինչը դժգոհության մեծ ալիք էր բարձրացրել ընդդիմադիր թեկնածուի աջակիցների շրջանում։ Ինչևէ, Էրդողանի կուսակցությունը ևս մեկ շանս ունի՝ իր ձեռքը վերցնելու երկրի «տնտեսական մայրաքաղաքի» ղեկը։