Գերմանիայում ՀՀ արտակարգ և լիազոր դեսպան Աշոտ Սմբատյանը կոչ է արել ցուցաբերել առավելագույն զգոնություն և չտրվել որևէ սադրանքի։
«Վերջին օրերի՝ հայ-ադրբեջանական սահմանի հյուսիս-արևելյան հատվածում Ադրբեջանի կողմից հրահրված մարտական գործողություններն իրենց արձագանքն են ստացել աշխարհի բազում երկրներում, այդ թվում և Գերմանիայում։ Արձանագրվում են ՀՀ դեսպանությունների, հայ համայնքների անդամների հանդեպ բռնության, գույքի վնասման կամ ոչնչացման դեպքեր։ Հրկիզվել է ԳԴՀ-ում ՀՀ դեսպանության ծառայողական մեքենան։
Հաշվի առնելով ստեղծված իրավիճակը և կիսելով ձեզանից յուրաքանչյուրի անհանգստությունը՝ խնդրում եմ առավելագույն զգոնություն և չտրվել որևէ սադրանքի։
Յուրաքանչյուրիդ խնդրում և հորդորում եմ չմասնակցել ԳԴՀ իշխանությունների կողմից չարտոնված որևէ նախաձեռնության կամ բողոքի ակցիայի, որը կարող է նպաստել արդեն իսկ առկա լարվածության աճին, ինչն էլ սադրիչների հետապնդած նպատակն է»,- հնարավոր սադրանքներից խուսափելու ուղերձով է հանդես եկել դեսպանը։
Աշոտ Սմբատյանը նշել է, որ պետք է գործել Գերմանիայի Դաշնային Հանրապետության օրենսդրության շրջանակներում։
«Դեսպանությունը շարունակում է աշխատել արտակարգ ռեժիմով՝ մշտական կապի մեջ լինելով Գերմանիայի պատկան մարմինների, ինչպես նաև հայկական համայնքային կառույցների ներկայացուցիչների հետ»,- ասված է հայտարարության մեջ։
