Արցախի Հանրապետության նախագահ Արայիկ Հարությունյանի ստորագրած հրամանագրով դադարեցվել են Գրիգորի Մարտիրոսյանի՝ որպես ԱՀ պարետի լիազորությունները և հանրապետության պարետ է նշանակվել ԱՀ տարածքային կառավարման և զարգացման նախարար Ժիրայր Միրզոյանը։ Այս մասին հայտարարություն է տարածել ԱՀ նախագահի աշխատակազմը։
Պարետի փոփոխության որոշումը պայմանավորված է այն հանգամանքով, որ առաջիկայում ԱԺ «Ազատ Հայրենիք – ՔՄԴ» խմբակցությունն առաջադրելու է Գրիգորի Մարտիրոսյանի թեկնածությունը ԱՀ Հաշվեքննիչ պալատի նախագահի պաշտոնում։
Նախագահը շեշտել է, որ Ժիրայր Միրզոյանի նշանակումը պարետի պաշտոնում պատահական չէ․նա ղեկավարում է մի կառույց, որը մշակում և համակարգում է տարածքային կառավարման քաղաքականությունը և հսկում է տեղական ինքնակառավարման մարմինների գործունեությունը։ Արայիկ Հարությունյանը համոզմունք է հայտնել, որ պետական և տեղական ինքնակառավարման մարմինների սերտ համագործակցության արդյունքում կհաջողվի հաղթահարել համավարակի հետ կապված մարտահրավերները։
Նշվում է, որ ԱՀ նախագահը հանձնարարել է խստացնել նոր կորոնավիրուսի դեմ պայքարի գործող կանոնները, մասնավորապես՝ խիստ վերահսկողություն սահմանել հանրային տրանսպորտի, առևտրի, սննդի և կենցաղային սպասարկման օբյեկտներում համաճարակային նորմերի պահպանման նկատմամբ, իսկ խախտումներ արձանագրելու դեպքում՝ տուգանել և սահմանափակել դրանց գործունեությունը։ Առաջիկայում պարետի որոշումներով մի շարք նոր սահմանափակումներ կլինեն նաև սգո արարողությունների և հարսանյաց հանդիսությունների կազմակերպման համար։
«Երկրի ղեկավարի հանձնարարականով հանրապետության բուժհաստատությունները կանցնեն իրենց բնականոն աշխատանքային ռեժիմին, կվերսկսվեն պլանային բուժումները, և այդ համատեքստում կսահմանափակվի բուժման նպատակով ՀՀ մեկնող քաղաքացիների ելքը»,- ասված է հաղորդագրության մեջ։
