Անահիտ Բախշյանը գործող իշխանություններից պահանջում է ականջալուր լինել Արշալույս Զուրաբյանի գրառմանը, որում ասված է․«Վանաձոր Քիմպրոմ»-ում մնացել են ահռելի քանակությամբ թունավոր նյութեր, մասնավորապես ամոնիակի հսկա տարաներ, որոնցում պահվում է շուրջ 90 տոննա ամոնիակ ու ամոնիակաջուր։ Պահպանության ժամկետն անցնելու պարագայում դրանք կարող են քիմիական աղետի սպառնալիք հանդիսանալ»։
Պարզվում է՝ 3 տարի անընդմեջ վանաձորցիները և համապատասխան մասնագետներն ահազանգում են, որ ամոնիակի պահպանման բաքերը, խողովակները և սարքավորումները ժամանակի ընթացքում քայքայվել են, պահեստարանում էլեկտրասնուցում չկա, ինչի հետևանքով չի գործում վթարային՝ վերգետնյա բաքերից մեկի վնասման դեպքում պահեստարանի տակ գտնվող ստորգետնյա պահեստային բաք ամոնիակի արտահոսքն ապահովող ավտոմատ համակարգը։ Աղետը չեզոքացնելու համար օր առաջ անհրաժեշտ է տարածքից հանել բոլոր քիմիական նյութերը՝ վաճառել կամ օտարել։
Տիկին Բախշյանը նախազգուշացնում է․«Աստված ոչ անի Բեյրութի դեպքը կրկնվի Վանաձորում, սրտանց անեծքի կարժանանան ՀՀ բոլոր ժամանակների կառավարությունները, բայց ամենից շատ գործող կառավարությունը, որին վստահել է ժողովուրդը»։
