ՀՀ սփյուռքի գործերի գլխավոր հանձնակատար Զարեհ Սինանյանը հաղորդագրություն է տարածել․
«Այսօր՝ վաղ առավոտից, Սփյուռքի գործերի գլխավոր հանձնակատարի գրասենյակը և ես անձամբ կապ ենք հաստատել Լիբանանի հայ համայնքի հոգևոր, կրթական, առողջապահական, բարեգործական, լրատվական տասնյակ կառույցների ներկայացուցիչների և ՀՀ դեսպան Վահագն Աթաբեկյանի հետ, կատարել Բեյրութում իրավիճակի ու կարիքների նախնական գնահատում»։
Ստացված տեղեկատվության համաձայն՝ համայնքում առկա են հետևյալ առաջնային կարիքները՝ դեղորայքի տրամադրման կամ գնման օգնություն (հատկապես քրոնիկական հիվանդություն ունեցողների համար), առաջնային անհրաժեշտության սնունդ և ջուր, հայահոծ թաղամասերում բնակարաննների, խանութների, եկեղեցիների, հանրային կենտրոնների վերանորոգման ֆինանսական աջակցություն, և հայրենադարձվել ցանկացողների վերադարձի գործընթացի հեշտացում և աջակցություն։
Համայնքային ներկայացուցիչները երկրորդային կարիք են մատնանշել համայնքային հոգեբանական աջակցության տրամադրումը։
Նշվում է, որ այսօր երեկոյան Մեծի Տանն Կիլիկիո Արամ Ա կաթողիկոսի գլխավորությամբ տեղի է ունենալու հավաք համայնքային ղեկավարների հետ, որի ընթացքում կքննարկվեն պայթյունի հետևանքով առաջացած հարցեր։ Այժմ կատարվում է կարիքների գնահատում, և վերջնական վերլուծության համար որոշ ժամանակ է անհրաժեշտ։ Ջանքեր են գործադրվում իրավիճակը ճիշտ գնահատելու ուղղությամբ, որը թույլ կտա աջակցությունը դարձնել ավելի թիրախային։
«Կարիքների հիման վրա մեր գրասենյակի կողմից կատարված վերլուծությամբ՝ կառաջարկվեն աջակցության ընթացիկ ուղիներ։ Վարչապետի և այլ գերատեսչությունների հետ քննարկում ենք ՀՀ հետագա քայլերի ողջ համալիրը։ Ցավոք, այս պահին ունենք ընդհուպ 11 զոհ, մի քանի տասնյակ վիրավորներ։ Այս թվերը վերջնական չեն»,- ասված է հայտարարության մեջ։
