Կառավարության նիստում վարչապետ Նիկոլ Փաշինյանն անդրադարձավ շրջանառության մեջ դրված հանրակրթության չափորոշչի նախագծին։
«Այս նախագիծը, որը դրված է շրջանառության մեջ, արտահայտում է մեր ռազմավարական պատկերացումները հանրակրթությունում անհրաժեշտ բարեփոխումների վերաբերյալ, այս ընթացքում այն կանցնի ընթացակարգերով, և մենք այդ ռազմավարական պատկերացումը պիտի արձանագրենք։ Հաջորդ փուլում ինձ մոտ քննարկում կունենանք առարկայական չափորոշիչների վերաբերյալ»,- արձանագրում է վարչապետը։
Փաշինյանը նշում է՝ այս ընթացքում եղել են լայն, բաց քննարկումներ չափորոշիչների շուրջ, քանի որ իրենք ցանկանում են ի ցույց դնել հանրությանը, որ գործող իշխանությունների ռազմավարական պատկերացումները բխում են ՀՀ պետական, ազգային շահերից, ՀՀ քաղաքացիների և յուրաքանչյուր անհատի շահերից։
Վարչապետն ընդգծում է՝ սա ուժեղ պետություն ունենալու համար անհրաժեշտ ռազմավարություն է, և որևէ մի բան մեզ չի շեղելու ուժեղ պետություն ստեղծելու ճանապարհից։
Նա շեշտում է, որ Հայաստանի ազգային անվտանգության ռազմավարությամբ սահմանված Հայոց պետականության հավիտենության հայեցակարգը կյանքի կոչելու գործում հանրակրթության չափորոշիչը ունի կարևորագույն և առանցքային նշանակություն։
Քրիստինե Հովսեփյան
