Այսօր կառավարության շենքի դիմաց մի խումբ քաղաքացիներ ակցիա էին իրականացնում՝ ընդդեմ Ամուլսարի հանքի շահագործման, սակայն, խաղաղ հավաքը, կարելի ասել, դեռ չսկսված ավարտվեց: Թեև ակցիայի մասնակիցների թիվն այնքան էլ մեծ չէր, բայց ոստիկանությունը մեծաթիվ ուժեր էր կենտրոնացրել Հանրապետության հրապարակի մոտակայքում:
Հավաքի մեկնարկից րոպեներ անց ոստիկանները բերման ենթարկեցին ակցիայի մասնակիցներին (այդ թվում իրավապաշտպան Նինա Կարապետյանցին)՝ կրկին հիշեցնելով, որ արտակարգ դրության պայմաններում արգելվում են նման միջոցառումները:
Երևանի փոխոստիկանապետ Արթուր Խուդինյանը հայտնեց, որ քաղաքացիները բերման են ենթարկվել ոստիկանի օրինական պահանջը չկատարելու հիմքով:
Արտյոմ Քոսակյան
