«Երեկ երեկոյան Լևոն Սարգսյանը տեղափոխվել է Հայաստան։ Այդ գործընթացն իրականացվել է ՀՀ Գլխավոր դատախազության, Ռուսաստանի Դաշնության Դատախազության համագործակցության արդյունքում, մեծ օժանդակություն է ցուցաբերվել ՀՀ արտաքին գործերի նախարարության կողմից, նաև, պայմանավորված սահմանների փակ լինելու և կարատինային վիճակի հետ, Պարետատան օժանդակության անհրաժեշտություն է եղել», – «Ազատությանը» հայտնել է Գոռ Աբրահամյանը՝ նշելով, որ այժմ նախապատրաստվում են համապատասխան դատավարական գործողություններ՝ կապված մեղադրանքի առաջադրման հետ, որին կհետևի կալանավորումը որպես խափանման միջոց վերահաստատելը։
Հիշեցնենք՝ 2018 թվականին ԱԺ նախկին պատգամավոր, նախկին ՀՀԿ-ական Լևոն Սարգսյանը՝ ավելի հայտնի որպես ալրաղացի Լյովիկ, ներգրավվել էր որպես մեղադրյալ 2008 թվականին ՀՀ մաքսային պետական կոմիտեի նախկին պետ Արմեն Ավետիսյանի առանձնատան վրա ավազակային հարձակման գործում հանցավոր համագործակցությանը մասնակցություն ունենալու համար։ Ըստ օդում կախված լուրերի՝ նախկին պատգամավորի դեմ ցուցմունք էր տվել ավազակային հարձակումն իրականացրած հանցավոր խմբի պարագլուխներից մեկը, և այդ սրտաբուխ խոստովանությունների հիման վրա էլ իրականացվել էին խուզարկություններ Լևոն Սարգսյանի առանձնատանը և բնակարանում։ Արդյունքում հայնաբերվել էր մեծ քանակությամբ զենք ու զինամթերք։ Հաշվի առնելով, որ դեռ վաղ ժամանակներում Լյովիկը համարվում էր նախկին կառավարությունների «մահակը», մեծ քանակի «ռազմամթերքի» առգրավվումը զարմանալի չէ։
Սարգսյան Լևոնի արնախում անհատականությանը տարիներ առաջ անդրադարձել են անգամ ռուսական լրատվամիջոցները։ Մասնավորապես «Moscow post»-ը Սարգսյանին անվանել է «ընդհատակյա գործողությունների վարպետ», ով իր թիկնապահների միջոցով կազմակերպել է հարձակումներ ընդդիմադիր լիդերների և այլախոհների վրա։ Լրատվամիջոցն առանձնացնում է 2004-ին իրավապաշտպան Միքայել Դանիելյանին դաժան ծեծի ենթարկելու դեպքը, Աշոտ Մանուչարյանի դեմ մահափորձը և 2008 թվականին Սարգսյանի հրամանով «Օդնակլասնիկի» սրճարանում 35-ամյա Անդրանիկ Բաբայանի սպանությունը։
Նման բեսպրեդելը, իհարկե, իր մեջ մեծ վտանգներ էր պարունակում, ուստի Լևոն Սարգսյանի հովանավորյալները շտապեցին նրան հեռացնել Ազգային ժողովից, հետո՝ նաև իրենց շարքերից։
Քրիստինե Հովսեփյան
